Danimarka baş naziri Qrenlandiyada: “ABŞ adanı ələ keçirməməlidir”
Frederiksenin səfəri, ABŞ-ın vitse-prezidenti J.D. Vansın ötən həftə Qrenlandiyadakı Amerika hava bazasına baş çəkməsi və Danimarkanı regiona kifayət qədər sərmayə qoymamaqda ittiham etməsindən sonraya təsadüf edir. Frederiksen “ABŞ Qrenlandiyanı ələ keçirməməlidir” deyərək, adanın taleyinin yalnız yerli xalq tərəfindən müəyyən edilməli olduğunu vurğulayıb.
Crossmedia.az xarici mediaya istinadən bildirir ki, Danimarkanın baş naziri Mette Frederiksen Qrenlandiyaya üç günlük səfəri zamanı ABŞ-ın adaya iddialarına qarşı çıxıb.
Qrenlandiya lideri Yens-Frederik Nilsen Frederiksenin səfərini müsbət qarşılayıb və ABŞ-ın ilhaq cəhdlərinə müqavimət göstərəcəklərini bildirib. Təxminən 57 min nəfər əhalisi olan Qrenlandiya illərdir Danimarkadan tam müstəqillik uğrunda mübarizə aparır.
Yeni Qrenlandiya hökuməti müstəqillik məsələsinə daha ehtiyatla yanaşır və Danimarka ilə əməkdaşlığın davam etdirilməsini vacib sayır. Frederiksenin səfəri zamanı Qrenlandiya və Danimarka arasında əməkdaşlıq, iqtisadi sərmayələr və regional təhlükəsizlik məsələlərinin müzakirə edilməsi planlaşdırılır.
Tramp administrasiyası Arktikanın strateji əhəmiyyətini vurğulayaraq, Qrenlandiyanın ABŞ-ın təhlükəsizliyi üçün kritik olduğunu iddia edib. Xüsusilə iqlim dəyişikliyi səbəbindən adanın təbii sərvətlərinin daha əlçatan olması Vaşinqtonun marağını artırıb.
Qrenlandiya və Danimarka rəsmiləri ABŞ-ın ilhaq cəhdlərinə qarşı çıxaraq, adanın gələcəyinə yalnız yerli xalqın qərar verməli olduğunu bildiriblər. Frederiksen “Biz Qrenlandiyanın rifahı üçün çalışırıq və bu torpağa sahib çıxacağıq” deyə bəyan edib.
Zəhra Ağayeva
12:53 03.04.2025
Oxunuş sayı: 6438
