Vaşinqtonda Azərbaycanın minatəmizləmə istiqamətində fəaliyyətinə dair təqdimat olub
Azərbaycanın ABŞ-dakı səfirliyinin təşkilatçılığı ilə Vaşinqton şəhərində yerləşən “Hudson” İnstitutu beyin mərkəzində Azərbaycan Respublikası Minatəmizləmə Agentliyinin (ANAMA) nümayəndə heyəti, AR Xarici İşlər Nazirliyi, səfirlik nümayəndələrinin iştirakı ilə dəyirmi masa təşkil edilib.
Agentliyin İdarə Heyəti sədrinin müavini Samir Poladov dəyirmi masada iştirak edən beyin mərkəzinin aparıcı eksperti Mayk Doran və digər əməkdaşlara, həmçinin tədqiqatçı və tələbələrə Azərbaycanda aparılan humanitar minatəmizləmə fəaliyyəti barədə məlumat verib. O bildirib ki, İkinci Qarabağ müharibəsi başa çatdıqdan sonra, yəni 2020-ci il noyabrın 10-dan bugünədək Azərbaycanda 385 nəfər mina qurbanı olub, bunlardan 315-i xəsarət alıb, 70 nəfər isə həyatını itirib. O, bu günlərdə daha bir nəfərin Ağdam rayonu ərazisində mina partlaması nəticəsində xəsarət aldığını qeyd edib. ANAMA rəsmisi bildirib ki, 2020-ci il 10 noyabr tarixindən bugünədək baş vermiş mina hadisələrindən 152-si işğaldan azad olunmuş ərazilərimizdə keçmiş təmas xəttindən kənarda qeydə alınıb.
Samir Poladov əlavə edib ki, indiyə kimi humanitar minatəmizləmə fəaliyyətinə ayrılmış vəsaitin təqribən 5 faizə qədər hissəsi beynəlxalq donorların hesabına, qalan hissəsi isə Azərbaycan hökumətinin öz resursları vasitəsilə həyata keçirilib. O, bu kimi səfərlərin beynəlxalq ictimaiyyətin Azərbaycandakı mina problemi və bu problemin aradan qaldırılması istiqamətində icra edilən fəaliyyətə dair məlumatlılığın və beynəlxalq donorların bu məsələyə diqqətinin və dəstəyinin artırılması məqsədi daşıdığını vurğulayıb.
ANAMA rəsmiləri dəyirmi masa zamanı “Hudson” İnstitutundan olan ekspertlərin Azərbaycanda həyata keçirilən humanitar minatəmizləmə əməliyyatları, istifadə olunan avadanlıq və texnikalar, donorların rolu barədə çoxsaylı suallarını cavablandırıblar.
Daha sonra ölkəmizdə mövcud mina problemi və mina təhlükəsi ilə mübarizə istiqamətində həyata keçirilən fəaliyyətə dair geniş təqdimat edilib və təqdimatda 2020-ci ilin 10 noyabrından bugünədək 190 min hektardan artıq ərazinin minalardan və partlamamış hərbi sursatlardan təmizləndiyi və bu müddətdə 36 mindən çox piyada əleyhinə, 21 mindən artıq tank əleyhinə mina və 133 mindən artıq partlamamış hərbi sursatın aşkar edildiyi qeyd olunub. Həmçinin ABŞ-ın Marşal İrsi İnstitutunun Azərbaycana 90-dan artıq minaaxtaran it ianə etdiyi, bununla yanaşı, ABŞ-ın müxtəlif qurum və institutlarının Azərbaycanda mina fəaliyyətləri proqramına dəstək məqsədilə həyata keçirdiyi təlimlər vurğulanıb. (azərtac)
09:35 03.04.2025
Oxunuş sayı: 555
