ABŞ-də kitabxana və muzeylər üçün maliyyələşdirmə dayandırıldı
ABŞ hökuməti hökumətin iş səmərəliliyini artırmaq məqsədilə yaradılmış DOGE Agentliyinin təşəbbüsü ilə Kitabxana və Muzey Xidmətləri İnstitutunun fəaliyyətini dayandırıb.
Crossmedia.az xəbər verir ki, bu barədə Wired jurnalın məlumat yayıb.
Belə ki, institutun bütün əməkdaşları gözlənilmədən məzuniyyətə göndərilib, iş prosesləri və maliyyə axınları faktiki olaraq dondurulub. Bu səbəbdən muzeylərə və kitabxanalara ayrılmış vəsaitlərin aqibəti sual altındadır.
Mütəxəssislərin sözlərinə görə, məzuniyyət müddəti bitdikdən sonra institutun əməkdaşları işdən çıxarıla bilər. Bu hal əvvəllər də digər ABŞ dövlət qurumlarında baş verib.
Agentliyin fəaliyyətinin dayanması nəticəsində kitabxanalar üçün yeni kitabların alınması, tələbə və şagird ekskursiyaları, ustad dərsləri, uşaqlar və yaşlılar üçün məşğələlər, eləcə də elektron kitablarla bağlı rəqəmsal platformalara çıxış təhlükə altına düşüb.
Bundan əlavə, institut ABŞ-nin yerli xalqlarının mədəni layihələrini də maliyyələşdirirdi. Məsələn, agentliyin dəstəyi ilə bir neçə yerli Amerika kitabxanası 54 min uşaq kitabı almalı idi. Lakin maliyyələşdirmənin dayandırılması səbəbindən bu proses yarımçıq qala bilər.
Qeyd edək ki, İnstitut ABŞ-dəki muzeylər və kitabxanalar üçün yeganə maliyyə mənbəyi olmasa da, xüsusilə kitabxana sahəsində ən böyük federal sponsor kimi çıxış edib.
Fatimə Məmmədova
17:20 02.04.2025
Oxunuş sayı: 896
