Marin Le Pen məhkəmə qərarını “demokratiya skandalı” adlandırdı
Fransanın ultra-sağçı “Milli Birlik” partiyasının lideri Marin Le Pen Avropa Parlamentinin vəsaitlərini təyinatı üzrə xərcləməməkdə təqsirli bilinərək 4 il həbs cəzasına məhkum edilib.
Crossmedia.az bildirir ki, bu cəzanın 2 ili şərti, 2 ili isə elektron qolbaqla ev dustaqlığında keçiriləcək. Həmçinin, ona 100 min avro məbləğində cərimə və 5 il ərzində seçkilərdə iştirak qadağası qoyulub.
Qeyd edək ki, Le Pen məhkəmənin bu qərarını “siyasi sistemin ona qarşı sui-istifadəsi” adlandırıb və bunun onun 2027-ci il prezident seçkilərində iştirakını əngəlləmək məqsədi daşıdığını bildirib. O, qərarı “dəhşətli ədalətsizlik” və “demokratiya skandalı” adlandıraraq, apellyasiya şikayəti verəcəyini açıqlayıb.
Həmçinin Le Penin rəhbərlik etdiyi partiyanın prezidenti Jordan Bardella məhkəmənin hökmünü “Fransız demokratiyasının edamı” kimi dəyərləndirib və tərəfdarlarını dinc etirazlara çağırıb. Məsələ beynəlxalq səviyyədə də diqqət çəkib.
Macarıstanın Baş naziri Viktor Orban və İtaliyanın Baş nazir müavini Matteo Salvini məhkəmə qərarını siyasi motivli hesab edərək Le Penə dəstək ifadə ediblər. Hazırda Marin Le Penin apellyasiya şikayəti məhkəmə tərəfindən nəzərdən keçirilir. Onun 2027-ci il prezident seçkilərində iştirak edib-etməyəcəyi isə bu prosesin nəticəsindən asılı olacaq.
Fidan Xəlilova
15:29 02.04.2025
Oxunuş sayı: 10478
