İran BMT Təhlükəsizlik Şurasına şikayət etdi: “Trampın bəyanatları aqressiv və beynəlxalq hüququn pozulmasıdır”
İran BMT Təhlükəsizlik Şurasına ABŞ-nin prezidenti Donald Trampın son açıqlamalarına qarşı rəsmi şikayət göndərib.
Crossmedia.az bildirir ki, Tehran Trampın bəyanatlarını “aqressiv və məsuliyyətsiz” adlandıraraq, bunun beynəlxalq hüququn və BMT Nizamnaməsinin “açıq-aşkar pozulması” olduğunu bildirib.
İranın BMT-dəki daimi nümayəndəsi Əmir Səid İrəvani Təhlükəsizlik Şurasına ünvanladığı məktubda qeyd edib ki, Tehran “hər hansı hərbi avantüra ilə bağlı ciddi xəbərdarlıq edir və ABŞ və ya onun müttəfiqi İsrail rejimi tərəfindən suverenliyinə, ərazi bütövlüyünə və milli maraqlarına qarşı hər hansı hücuma dərhal və qətiyyətlə cavab verəcək”.
Həmçinin məktubda bildirilir ki, Tramp İranı bombalamaq və əlavə sanksiyalar tətbiq etməklə hədələyib. Bu isə regionda gərginliyi daha da artırır.
Qeyd edək ki, İran ABŞ-nin onu BMT Təhlükəsizlik Şurasının silah embarqosu ilə bağlı qərarlarını pozmaqda ittiham etməsini rədd edir və Yaxın Şərqdə sabitliyi pozan hərəkətlərdə iştirak etmədiyini bildirir.İranın ali dini lideri Ayətullah Əli Xamenei isə Trampın təhdidlərinə cavab olaraq ölkənin hərbi və raket imkanlarını daha da gücləndirməyin vacib olduğunu vurğulayıb. Onun sözlərinə görə, İranın müdafiə qüdrəti düşmənləri üçün ciddi çəkindirici amildir.
Fidan Xəlilova
15:23 02.04.2025
Oxunuş sayı: 6418
