Aprel döyüşləri böyük tarixi zəfərimizin ilkin müjdəsi idi - AÇIQLAMA
Azərbaycan Ordusunun gücünü və qətiyyətini nümayiş etdirən 2016-cı ilin Aprel döyüşləri müasir hərb tariximizdə mühüm mərhələ kimi yadda qalıb. Qısa müddət ərzində strateji yüksəkliklərin azad edilməsi təkcə hərbi uğur deyil, eyni zamanda xalqın döyüş ruhunun, dövlət-ordu birliyinin göstəricisi idi. Həmin hadisələr Azərbaycanın işğal altındakı torpaqlarını azad etmək əzminin və gücünün real təsdiqi oldu.
Mövzu ilə bağlı Milli Məclisin deputatı Hikmət Babaoğlu Crossmedia.az-a açıqlamasında Aprel döyüşlərinin bu tarixi əhəmiyyətindən bəhs edib:
"Aprel döyüşləri kimi tarixə düşən 2016-cı ilin 3-4 aprel hadisələri böyük tarixi zəfərimizin ilkin müjdəsi idi. Məhz aprel ayında Azərbaycan əsgəri, rəşadətli ordumuz göstərdi ki, erməni işğalçıları üzərində qalib gəlmək mümkündür və qısa müddətdə xeyli ərazini işğaldan azad etməklə strateji yüksəklikləri ələ keçirdik. Bu, artıq Azərbaycan Ordusunun böyük qələbəyə hazır olduğunun göstəricisi idi.
Amma, əlbəttə ki, daha əhəmiyyətlisi ondan ibarətdir ki, bu döyüşlər ermənilərin yaratmağa çalışdığı "erməni məğlubedilməzliyi" sindromunu darmadağın etdi. Azərbaycan Ordusu gücünün nəyə qadir olduğunu göstərmiş oldu. Yalnız bundan sonra siyasi-diplomatik müstəvidə ermənilər daha mülayim mövqe tutmağa başladılar. Ancaq yenə də dörd il davam edən danışıqlar prosesində öz mövqelərindən geri çəkilmədilər.
Aprel döyüşləri həm də milli psixoloji əhval-ruhiyyəmizin yüksəlməsi baxımından əhəmiyyətli idi. Artıq döyüşlərdən sonra bəlli oldu ki, hər bir Azərbaycan vətəndaşı, vətəndaş olmaqla bərabər, həm də vətən üçün əsgərdir. Öz davranışlarında, orduya dəstəyində, Müzəffər Ali Baş Komandanımıza dəstəyində bunu nümayiş etdirməklə xalq-iqtidar birliyini göstərmiş olduq. Beləliklə, birliyimiz yenidən həmrəylik simvoluna çevrildi və nəticə etibarilə artıq 2020-ci ildə erməni təxribatına cavab verərkən Azərbaycan Ordusu bütün dünyaya nəyə qadir olduğunu göstərdi.
Buna görə də heç vaxt Azərbaycan əsgəri "məğlubedilmişlik sindromuna" uğramadı. Aprel döyüşləri ilə Azərbaycan xalqı yüksək mənəvi birliyə sahib olduğunu sübut etdi. Və bu, tarixi zəfərimizə gedən yolun başlanğıcı oldu".
Zəhra Məmmədova
09:37 02.04.2025
Oxunuş sayı: 7094
