Azərbaycanın prisipial mövqeyi - Almaniya üzrxahlıq etdi
Almaniya Federativ Respublikasının Prezidenti Frank-Valter Ştaynmayerin sosial şəbəkə hesabında yol verilmiş texniki qüsurun aradan qaldırılması, Azərbaycan Respublikasının Prezidenti cənab İlham Əliyevin prinsipial mövqeyinin beynəlxalq münasibətlər sistemində qəbul edilməsini bir daha təsdiq edir.
Crossmedia.az-a Milli Məclisin deputatı Rizvan Nəbiyev mövzuyla bağlı açıqlama verib: "Bu, eyni zamanda Almaniya Federativ Respublikasının Azərbaycan tərəfinin irəli sürdüyü tələblərə münasibətdə atdığı adekvat addım kimi qiymətləndirilə bilər".
Deputat qeyd edib ki, Almaniya tərəfi, Prezident ofisi səviyyəsində, dövlət katibi vəzifəsini daşıyan nümayəndə tərəfindən göndərilmiş məktubda, yol verilmiş texniki xətaya görə məyusluğunu ifadə edərək, səmimi üzrxahlığını bildirib: "Bu, həmin texniki yanlışlığın təsadüfi olduğunu və Almaniyanın rəsmi mövqeyi ilə heç bir əlaqəsinin olmadığını göstərir. Digər mühüm məqam ondan ibarətdir ki, Almaniya Federativ Respublikası bu hadisənin Azərbaycanın ərazi bütövlüyü və suverenliyi ilə bağlı rəsmi mövqeyinə heç bir təsir göstərmədiyini vurğulamışdır. Qeyd etmək lazımdır ki, Almaniya 1992-ci ildən etibarən Azərbaycanla diplomatik münasibətlər qurduqdan sonra, 1995-ci ildə imzalanmış "Dövlətlərarası Münasibətlərin Əsasları Haqqında Anlaşma Memorandumu"nda, 2009-cu ildə Bundestaqın Cənubi Qafqazda sabitliklə bağlı qəbul etdiyi qətnamədə və 2015-ci ildə qəbul edilən digər sənədlərdə Azərbaycanın ərazi bütövlüyünü və suverenliyini birmənalı şəkildə dəstəkləmişdir".
Rizvan Nəbiyev bildirib ki, digər mühüm məqam isə AFR prezidentinin Azərbaycana səfərinin əsas məqsədinin iki ölkə arasında strateji tərəfdaşlığın möhkəmləndirilməsi olmasıdır. "Qeyd edilməlidir ki, doktor Ştaynmayer hələ Almaniyanın Xarici İşlər naziri vəzifəsində çalışdığı dövrlərdən etibarən Azərbaycan Respublikasının Prezidenti cənab İlham Əliyevlə səmimi və açıq dialoq şəraitində əlaqələr saxlamışdır. Bu münasibətlər illər boyu inkişaf etmiş, müxtəlif beynəlxalq platformalarda və rəsmi səfərlər zamanı daha da möhkəmlənmişdir. Azərbaycan Prezidenti dəfələrlə həm Almaniyada, həm də Bakıda doktor Ştaynmayeri qəbul etmiş, tərəflər arasında çoxsaylı telefon danışıqları baş tutmuşdur".
"Son olaraq, qeyd edilməlidir ki, bu hadisənin diplomatik skandala çevrilməsinə və ikitərəfli münasibətlərdə eskalasiyasına yol verilməmişdir. Azərbaycan Prezidenti cənab İlham Əliyevin prinsipial və qətiyyətli mövqeyi sayəsində bu təxribatın qarşısı alınmış və Azərbaycan-Almaniya münasibətlərinə zərbə vurulmasının qarşısı müvəffəqiyyətlə kəsilmişdir" - sonda deputat vurğulayıb.
Xumar Emilqızı
17:02 01.04.2025
Oxunuş sayı: 829
