Almaniya liderinin Cənubi Qafqaz turnesi: Avropa Azərbaycanın gücünü anlayır
Almaniya Prezidentinin Cənubi Qafqaza səfəri və Azərbaycanın beynəlxalq siyasətdəki rolu
Almaniya Prezidenti Frank-Valter Ştaynmayer və xanımı Elke Büdenbenderin Cənubi Qafqaza səfəri başlayıb.
Martın 30-dan aprelin 2-dək davam edəcək rəsmi proqrama əsasən, prezidentlə xanımı Azərbaycan və Ermənistanda bir sıra vacib görüşlərdə iştirak edəcəklər.
Dövlət başçısının növbəti "dayanacağı" Azərbaycan olacaq. Ştaynmayerin səfəri çərçivəsində ikitərəfli münasibətlərin müzakirəsi və regional məsələlərin gündəmə gətirilməsi gözlənilir.
Almaniya Prezidentinin Cənubi Qafqaza səfəriylə bağlı Crossmedia.az saytına açıqlama verən Milli Məclisin Ddputatı Ziyad Səmədzadənin sözlərinə görə, ölkələr arasında diqqət mərkəzinə çevrilən Azərbaycan, xüsusilə Fransa başda olmaqla, bəzi Avropa ölkələrinin əsassız və rəsmi Bakıya qarşı mənfi siyasətlərinə baxmayaraq, beynəlxalq aləmdə söz sahibidir: "Almaniya bəzi məsələlərdə Fransa ilə birlikdə olsa da, açıq-şəkildə qəbul edir ki, Azərbaycan bu gün dünya siyasətində mühüm rol oynayır. Prezident İlham Əliyev ilə Almaniya kansleri arasında keçirilən dialoqlar, Azərbaycanın yüksək diplomat tərəfindən idarə olunan bir dövlət olduğunu və həm Şərqdə, həm də Qərbdə nüfuzunun artdığını göstərir. Bu, digər dövlətləri Azərbaycanla hesablaşmağa məcbur edir.
Deputat bildirib ki, Azərbaycan, Avropanın enerji təhlükəsizliyində mühüm rol oynayır və çətin zamanlarda da bu məsuliyyəti üzərinə götürür: "Eyni zamanda, yaşıl enerji sahəsində cəsarətli addımlar atır və müstəqil siyasətini uğurla həyata keçirir. Azərbaycan, türk dövlətlərinin birliyinin möhkəmləndirilməsində əvəzsiz xidmətlər göstərir. İkinci Qarabağ müharibəsindən sonra işğaldan azad edilmiş ərazilərin bərpası istiqamətində görülən işlər də misilsizdir.
"Bu günlərdə, Avropa və Amerika arasındakı münasibətlərin gərginləşməsi fonunda, hər bir dövlət yeni güclü müttəfiqlər axtarır. Almaniya və digər Avropa ölkələri, Ermənistanla münasibətlərini nəzərdən keçirsə də, Ermənistan artıq müharibədə məğlub olmuş bir dövlətdir. Fransa, Ermənistana himayədarlıq etsə də və silahlanma sahəsində güclənməyə çalışsa da, Azərbaycan iqtisadi inkişafını sürətləndirməkdə, gücünü artırmaqda və müstəqil siyasətini davam etdirməkdədir. İkinci Qarabağ müharibəsindən sonra azad edilmiş ərazilərə qaçqınların köçürülməsi ilə bağlı görülən işlər də təqdirəlayiqdir ", - deyə müsahibimiz vurğulayıb.
Sonda Z.Səmədzadə bildirib ki, bəzi Avropa nümayəndələri Azərbaycana qarşı xoşagəlməz məlumatlar yaysa da, Azərbaycan öz mövqeyini möhkəmləndirərək, dünya səhnəsində sülh və əmin-amanlığa xidmət edən bir siyasət yeridir: " Bu siyasət milli maraqları qorumağa yönəlmişdir. Azərbaycan müstəqil siyasətini həyata keçirir və heç kimdən asılı deyil. Heç kimə borclu deyil, müharibədə qalib gəlib, iqtisadiyyatını gücləndirib, ölkədə sabitlik və xalq birliyini təmin edib. Bütün bunların nəticəsində Azərbaycan dünya tarixində görünməmiş bir qələbə əldə edib. Bu dövlətin hörməti artır və belə bir dövlətlə əməkdaşlıq etmək istəyənlərin sayı hər gün daha da artacaq".
Pərvin Hacıyeva
16:55 01.04.2025
Oxunuş sayı: 1033
