Gürcüstanda mühüm qanun qaəbul olundu: Bundan sonra ölkədə nə dəyişəcək?
Gürcüstan parlamenti “Xarici agentlər haqqında" qanunu üçüncü və sonuncu oxunuşda qəbul edib. Qanunun lehinə isə 86 deputat səs verib. Sənəd prezident tərəfindən imzalandıqdan və ölkənin qanunverici orqanının rəsmi saytında dərc edildikdən sonra qüvvəyə minəcək.
Sənəd ABŞ-nin FARA (Xarici Agentlərin Qeydiyyatı Aktı) modelinə əsaslanır. Bu proses Gürcüstanda böyük ictimai etirazlara səbəb olub. Müxalifət və vətəndaş cəmiyyəti qanunun söz və media azadlığını məhdudlaşdıracağını iddia edir. Hakimiyyət isə bildirir ki, sənəd şəffaflığın artırılmasına və xaricdən maliyyələşən təşkilatların hesabatlılığının təmin olunmasına xidmət edir.
Bu barədə Crossmedia.az-a politoloq Turab Rzayev bildirib ki, Gürcüstan hakimiyyəti "Xarici agentliklər haqqında" qanun qəbul etməyə qətiyyətlə yanaşır: "Açıq şəkildə ortada mövqe qoydular ki, burada nə Avropa İttifaqının (Aİ), nə də ABŞ-nin mövqeyini və onların təsirlərini nəzərə alacaqlar. Geniş vətəndaş cəmiyyətinin və müxalifətin etirazlarını nəzərə almayaraq, əvvəlki kimi agentlik haqqında qanun qəbul edəcəklər. Beləliklə, hökumət faktiki olaraq parlamenti boykot etmiş və parlament iclaslarına qatılmayan hökumətin legitimliyinə kölgə salıb, müxalifətlə dialoq qapılarını bağlamış oldu. Bu qərar ilə müxalifətlə yenidən iqtidarın bir araya gəlməsi və dialoq qurması çətin olacaq. Eyni zamanda vətəndaş cəmiyyəti ilə də açıq şəkildə hökumət körpüləri yandırmış oldu. Digər tərəfdən, ABŞ və Aİ-nin təzyiqləri, hətta Gürcüstan stansiyalarına qarşı olan təzyiqlər də var. Gürcüstan hökuməti düşünür ki, bu mərhələdə ABŞ-dən kifayət qədər təzyiq gəlməyəcək. Çünki Vaşinqton faktiki olaraq xarici maliyyələşdirməni dayandırıb. Məsələn, Azadlıq Radiosu, Avropa Radiosu, ABŞ-ınin USAID və digər təşkilatlar maliyyə yardımlarını dayandırıb".
Ekspertin sözlərinə görə, rəsmi Tbilisi belə bir vəziyyətdə ABŞ-dən daha çox Aİ-dən təzyiqlərin gələcəyini düşünür: "Amma Aİ artıq daha çox Ukrayna münaqişəsi, Rusiya ilə münasibətlər və ABŞ ilə əlaqələrə fokuslandığını bildirib. Bu səbəbdən böyük ehtimalla Aİ Gürcüstanı lazımi qədər təzyiq altında saxlaya bilməyəcək. Bu vəziyyət, Gürcüstan hökumətinin liberal qruplarla körpüləri yandırmağa hazır olduğunu göstərir. Açıq şəkildə, Gürcüstanın qlobal qarşıdurmada Rusiyanın və Çin blokunun yanında mövqeyini gücləndirdiyini göstərir. Eyni zamanda, ABŞ və Aİ arasındakı münasibətlərdə yaranan fikir ayrılıqlarından istifadə edərək Gürcüstan hökuməti öz siyasətini həyata keçirməyə davam edəcək”.
Fatimə Məmmədova
16:42 01.04.2025
Oxunuş sayı: 902
