Vəd edilmiş, lakin gecikən səfər: "İran Prezidenti Bakıda Azərbaycan türkcəsində mesaj verəcək"
Azərbaycan və İran arasındakı siyasi və iqtisadi münasibətlərin yeni mərhələyə qədəm qoyduğu bir dövrdə İran Prezidenti Məsud Pezeşkianın Azərbaycana rəsmi səfəri planlaşdırılır.
Bu səfər Pezeşkianın İran Prezidenti vəzifəsində ölkəmizə ilk rəsmi səfəri olacaq. Fevral ayında Azərbaycan Prezidentinin köməkçisi Hikmət Hacıyevin Tehrana səfəri zamanı Prezident İlham Əliyevin rəsmi dəvəti İran tərəfinə çatdırılmışdı. Bu görüş çərçivəsində iki ölkə arasında əməkdaşlığın inkişafı və qarşılıqlı maraq doğuran məsələlər müzakirə olunmuşdu.
Pezeşkianın səfəri Azərbaycan-İran münasibətlərində yeni səhifə aça və ikitərəfli əlaqələrin möhkəmlənməsinə töhfə verə bilər.
İran Prezidentinin Azərbaycana gözlənilən səfəri barədə Crossmedia.az-a Orta Doğu araşdırmalar mərkəzinin sədri, siyasi şərhçi Sədrəddin Soltan deyib ki, onun 2024-cü ilin noyabr ayında keçirilən COP-29 çərçivəsində Bakıya səfəri gözlənilirdi: "Lakin məlum səbəblərdən bu səfər reallaşmadı. Buna görə də Pezeşkianın Bakıya bu səfəri vəd edilmiş, lakin gecikmiş səfər kimi qiymətləndirilə bilər".
S. Soltan qeyd edib ki, səfərdən qeyri-adi bir addım gözləmək sadəlövhlük olardı. "İran hakimiyyətinin Azərbaycana qarşı konkret siyasəti var və Pezeşkian hökumət başçısı kimi bu siyasətin icraçısıdır. Bu siyasətin əsas məqsədi Azərbaycanla iqtisadi əlaqələri inkişaf etdirməkdir. Xüsusilə, Cənub-Şimal nəqliyyat dəhlizinin reallaşması, energetika sahəsində əməkdaşlığın genişləndirilməsi, Araz çayı üzərindən Naxçıvana yolun açılması, ortaq su elektrik stansiyalarının tikintisi və istismarı, eləcə də Cənubi Qafqazda sülh və əməkdaşlığın dəstəklənməsi kimi məsələlər müzakirə mövzusu ola bilər".
Siyasi şərhçi həmçinin vurğulayıb ki, Pezeşkian Bakı səfəri zamanı Azərbaycan türkcəsində qısa bir açıqlama verməsi mümkündür: "Lakin Bakı-Tehran münasibətlərinin gələcəkdə daha geniş səviyyədə inkişaf edəcəyi ehtimalı azdır. Bunun əsas səbəblərindən biri Tehran hakimiyyətinə qarşı beynəlxalq təzyiqlərin artmasıdır".
Xumar Emilqızı
15:45 01.04.2025
Oxunuş sayı: 1606
