Gürcüstanın Baş naziri ölkə müsəlmanları üçün iftar süfrəsi təşkil edib
Gürcüstanın Baş naziri İrakli Kobaxidze martın 28-də ölkə müsəlmanları üçün iftar süfrəsi təşkil edib. Baş nazir müsəlmanları müqəddəs Ramazan bayramı münasibətilə təbrik edib və bildirib ki, Ramazan haqqa qayıdış, paklıq, xeyirxahlıq və insanpərvərlik ayıdır.
Baş nazir deyib: “Biz fəxr edirik ki, Gürcüstan çoxşaxəli, çoxmillətli və çoxkonfessiyalı ölkədir. Gürcüstan hökuməti müsəlman icmasını maksimum dərəcədə dəstəkləyir və bu dəstək gələcəkdə də davam edəcək”.
Hökumət başçısı müsəlman icmasının ölkənin inkişafına verdiyi töhfələrdən danışıb.
“Bizim həqiqətən nümunəvi birgə yaşayışımız var və biz birlikdə ümumi ölkəmizin gələcəyini yaradırıq. Gürcüstan hökuməti xüsusilə 2014-cü ildən sonra müsəlman icmasına maksimum dəstək verir və bu dəstək gələcəkdə də davam edəcək. Son 10 il ərzində 250-dən çox məscid daimi istifadə üçün müsəlman icmasına verilib, eyni zamanda, bu illər ərzində hökumət tərəfindən 35 milyon lari vəsait ayrılıb”, - deyə Baş nazir bildirib.
İftar məclisində Dini İşlər üzrə Dövlət Agentliyinin sədri Zaza Vaşakmadze, Qərbi Gürcüstanın müftisi Adam Şantadze, Gürcüstan Müsəlmanları İdarəsinin Şeyxi Faiq Nəbiyev və Şərqi Gürcüstanın müftisi Etibar Eminov çıxış ediblər.
Gürcüstanın Baş nazirinin adından müsəlman icmasının şərəfinə təşkil olunan iftarda Barışıq və vətəndaş bərabərliyi üzrə dövlət naziri Tea Axvlediani, Acarıstan Muxtar Respublikası Hökumətinin sədri Tornike Ricvadze, parlament üzvləri, dövlət nümayəndələri, diplomatik korpusun nümayəndələri iştirak ediblər. (Azərtac)
09:01 29.03.2025
Oxunuş sayı: 1323
