Aİ əl çəkir, Ermənistan əl çəkmir: "Azərbaycan lazımi addımları atır"
Ermənistan xarici işlər nazirinin müavini Paruyr Hovhannisyan deyib ki, Emənistan Azərbaycanla sülh sazişi imzalandıqdan sonra da, müşahidəçilərin Ermənistan-Azərbaycan sərhədindən çıxmalı olduğu halda belə, Avropa İttifaqının (Aİ) mülki missiyası ilə əməkdaşlıq etmək niyyətindədir.
"Biz Aİ ilə müşahidəçilərin yeni mandatını müzakirə edə bilərik və əməkdaşlıq mütləq sərhəd məsələləri ilə məhdudlaşmamalıdır. Biz Avropa müşahidəçiləri ilə işimizi davam etdirmək üçün düzgün model tapa biləcəyik", - o qeyd edib.
P.Hovhannisyan, həmçinin bildirib ki, Ermənistan vətəndaşları üçün Aİ ilə viza rejiminin liberallaşdırılması üzrə növbəti danışıqlar raundu apreldə keçiriləcək: "Növbəti mərhələ 2025-ci ilin aprelin 7-11-də planlaşdırılıb”.
Ermənistanın Aİ ilə bağlı bu ritorikası "İt əl çəkir, motal əl çəkmir" misalını xatırladır. Nədir, Ermənistanın bu Aİ missiyası? İrəvanın məqsədi nədir və nə zamana qədər Avropanın "ətəyindən yapışacaq?".
Bu barədə Crossmedia.az-a danışan Milli Məclisin deputatı Məzahir Əfəndiyev deyib ki, siyasət arxitekturasında çox ciddi nizamlanma, təkmilləşmə və yeniləşmə prosesləri baş verir: "İstər beynəlxalq təşkilatların iş fəaliyyətində, istərsə də dünya böyük dövlətlərinin siyasətində, xüsusilə də ABŞ-ın yeni seçilmiş prezidentinin yanaşmalarında həddindən artıq yeni məqamlar var. Bu yeniliklər də öz növbəsində siyasətdə bir çox məqamları yenidən nəzərdən keçirmək, eləcə də bir çox məsələlərə daha aydın baxmaq və nəticə etibarilə bu yeniləşən səthi arxitekturaya hər bir ölkənin öz töhfə vermək zərurətini ortaya qoyur. Təbii ki, bu gün Azərbaycan xalqı üçün ən əhəmiyyətli məqam ondan ibarətdir ki, 2020-ci ildə əldə olunmuş zəfər nəticəsində bərpa etdiyimiz suverenliyimizi qorunsun. Prezident İlham Əliyev də bütün çıxışlarında vurğulayır ki, Azərbaycan dövlətinin, Azərbaycan xalqının suverenliyi bütün müqavilələrdə öz əksini tapmalıdır".
Deputat Ermənistanın saxta bəyanatlarından danışıb: "Ermənistan isə, şübhəsiz ki, məğlub olan tərəfdir. Biz bu il suverenliyimizin 5 illiyini qeyd edəcəyik. Ermənistanda bəzi qruplar bunu qəbul edə bilmir və çalışırlar ki, saxta bəyanatlar yayaraq təxribatlar törətsinlər. Buna baxmayaraq, bir daha qeyd etmək istəyirəm ki, Azərbaycan xalqının bu zəfəri, qəhrəman övladlarımızın və şanlı ordumuzun qələbəsi, birmənalı olaraq, Cənubi Qafqazda lider olan Azərbaycan dövlətinin bundan sonra da müstəqil fəaliyyətini davam etdirməsi üçün hesablanmış əsaslı yanaşmadır".
M.Əfəndiyevin sözlərinə görə, Avropa və Azərbaycan arasındakı münasibətlər çox yaxşı müstəvidə irəliləyir: "Aİ-nin 9 dövləti Azərbaycanla siyasi müttəfiqdir. Bu dövlətlər Azərbaycanın iqtisadi layihələrində, xüsusilə də qazın Azərbaycandan Avropaya nəqlində əməkdaşlıq edirlər. Ümumilikdə qeyd etmək lazımdır ki, Aİ ilə Azərbaycan arasında imzalanmış xüsusi memorandum mövcuddur. Bütün bunlar Azərbaycanla Aİ arasında mövcud münasibətləri gücləndirir. Lakin bu münasibətlərin daha yeni müstəvidə və daha yüksək səviyyədə qurulması üçün danışıqlar və fəaliyyətlər davam etdirilməlidi. Düşünürəm ki, Azərbaycan tərəfindən bu yöndə lazımi addımlar atılır".
Ayhan Ağarzayev
16:10 24.03.2025
Oxunuş sayı: 1780
