Qətər və Misir İsrailin Qəzzaya yenidən hücumlarını pisləyib
Qətər Xarici İşlər Nazirliyi çərşənbə axşamı İsrailin Qəzza zolağına hücumlarını yenidən başlatmasını pisləyib və bunun regional sabitliyi təhdid etdiyini bildirib. Atəşkəsin əldə olunmasında əsas rol oynayan Misir də İsrailin hücumlarını qınayıb.
HƏMAS tərəfindən saxlanılan girovların ailələri Qəzzada döyüşlərin yenidən başlamasının onların yaxınlarını riskə atdığını qeyd edərək, tərəfdarlarını İsrail parlamenti qarşısında etiraz etməyə çağırıblar.
Efrat Ben Barak parlament qarşısında keçirilən etiraz aksiyasında, “Netanyahu və hökumətinin atdığı pis addımdan sonra bu gün ofisdə otura bilmədim”,- deyib.
O əlavə edib ki, “Netanyahu yəqin ki, artan etirazlarla divarların ona yaxınlaşdığını hiss edib”.
İsrail tərəfi bəyan edib ki, onlar hava hücumlarını Həmasın Qəzza zolağında saxlanılan girovları azad etməkdən imtina etməsindən sonra həyata keçiriblər. İsrail Xarici İşlər Nazirliyinin sözçüsü Oren Marmorstein bildirib ki, “Həmas ABŞ-nin xüsusi elçisi Stiv Vitkoffun təqdim etdiyi iki konkret vasitəçilik təklifini rədd edib”.
Müharibə başlayandan bəri Netanyahu israilli girovların azad edilməsi üçün ailələri tərəfindən ağır təzyiqlərlə üzləşib. O, eyni zamanda müharibəni davam etdirmək və Həmasa son qoymaq üçün ifrat sağçı koalisiya üzvlərinin təzyiqi altındadır.
BMT-nin İnsan Haqları sözçüsü Thameen Al Kheetan İsrailin hava hücumlarından “dəhşətə düşdüyünü” bildirib və qalan israilli girovların “şərtsiz azad edilməsinə” çağırıb. O, “bütün nüfuzlu dövlətləri sülhə nail olmaq və mülki əhalinin daha çox əziyyət çəkməməsi üçün əllərindən gələni etməyə” səsləyib.
O vurğulayıb ki, “İsrailin daha çox hərbi gücə əl atması, onsuz da fəlakətli şəraitdən əziyyət çəkən Fələstin əhalisinə daha çox bədbəxtlik gətirəcək”.
Ağ Ev İsrailin hərəkətləri ilə bağlı məsləhətləşmələrin aparıldığını və onlara dəstək ifadə olunduğunu bəyan edib.
Zəhra Ağayeva
22:58 18.03.2025
Oxunuş sayı: 6756
