Ermənistanda revanşizm güclənib: "Azərbaycan öz sözünü deməyə tam hazırdır"
Son zamanlar Ermənistanın hərbi təxribatları yenidən intensivləşib. Ermənistan ordusu son bir neçə gündür Azərbaycan Silahlı Qüvvələrinin müxtəlif istiqamətlərdəki mövqelərini atəşə tutur. Ermənistanın müxtəlif ölkələrdən, xüsusilə də Fransadan hərbi texnika və pilotsuz uçuş aparatları (PUA) almağa çalışması yeni müharibə ehtimalını artırır. Avropa İttifaqının (Aİ) Ermənistanı silahlandırması və hərbi dəstək verməsi bölgədəki gərginliyi daha da artırır. Bu proses də sülh danışıqlarına mane ola bilər və tərəflər arasındakı formalaşmaqda olan etimad mühitinə zərbə vura bilər. Azərbaycan sülh prosesinin davam etməsini və bölgədə sabitliyin qorunmasını istəsə də, Ermənistan tərəfinin vaxtaşırı atəşkəsi pozması, sərhəddə mövqelərimizi atəşə tutması və təxribat xarakterli addımlar atması vəziyyəti mürəkkəbləşdirir. Bundan əlavə, Ermənistan mətbuatında və siyasi dairələrdə tez-tez revanşist çağırışların edilməsi sülh danışıqlarına mane olan əsas faktorlardan biridir.
Bütün bunlar barədə Crossmedia.az -a açıqlamasında Milli Məclisin deputatı Məlahət İbrahimqızı bildirib ki, son 30 ilə hətta ondan da əvvəlki dövrlərə baxsaq, ermənilərin heç vaxt sülh niyyətində olmadığını aydın görünər:
“Onlar hələ də "Dəmir Yumruğun" təsirindən tam ayılmayıblar.Əslində Azərbaycan müharibə istəmirdi, məsələni sülh və danışıqlar yolu ilə həll etməyə çalışırdı. Amma 2019-2020-ci illərdə Ermənistan o qədər təxribata yol verdi ki, Azərbaycan buna cavab verməyə məcbur oldu. Nəticədə Ali Baş Komandanın rəhbərliyi və ordumuzun gücü sayəsində torpaqlarımızı geri aldıq. Digər tərəfdən, Fransa, ABŞ və bəzi başqa ölkələr Ermənistanı dəstəkləyir. Kimisi Qarabağın “Artsax” olduğunu iddia edir, kimisi isə erməni xalqının səhv etdiyini deyir. Aydındır ki, Ermənistan ordusunda revanşist qüvvələr güclənib. Hətta erməni televiziya kanallarında uşaqlara Azərbaycana qarşı nifrət aşılanmasını, Azərbaycan və Türkiyə bayraqlarını tapdalamağı öyrətmələrini görürük”.
Deputat bildirib ki, son vaxtlar təxribatlar daha da artıb və buna yalnız Ermənistan deyil, Aİ monitorinq missiyası da məsuliyyət daşıyır: "Əgər Ermənistan bu təxribatları davam etdirərsə, Azərbaycan həm diplomatik, həm də hərbi və siyasi gücü ilə lazımi cavabı verəcək. Beynəlxalq təşkilatlar, xüsusilə Fransa, ABŞ və Avropa bu məsələdə məsuliyyət daşıyır. Əgər onlar bu təxribatların artmasına göz yumsalar, Azərbaycan öz sözünü deməyə tam hazırdır".
Fidan Xəlilova
15:46 18.03.2025
Oxunuş sayı: 1197
