Ermənistan köhnə adətindən əl çəkmir: "Təxribatlar intensivləşəcək"
Azərbaycan Müdafiə Nazirliyinin məlumatına görə, martın 16-sı saat 20:10-dan 20:45-dək Ermənistan silahlı qüvvələrinin bölmələri Gorus rayonunun Burun yaşayış məntəqəsi istiqamətində yerləşən mövqelərindən Ordumuzun mövqelərini atıcı silahlardan bir neçə dəfə atəşə tutub. Bundan əvvəl saat 18:35-də və 09:45-də də Ermənistan silahlı qüvvələri Ordumuzun mövqelərini atıcı silahlardan atəşə tutub.
Azərbaycanla Ermənistan sülh razılaşması mətninin tam hazır olmasından cəmi bir neçə gün sonra Ermənistanın belə sabotajlara əl atması, bəlkə də, onu tanımayan dövlətlər üçün təəccüb yarada bilər. Amma bu, region dövlətlərində, o cümlədən rəsmi Bakıda heyrət yaratmadı. Çünki biz Ermənistanın sözü ilə əməlinin üst- üstə düşməməsinə çoxdan öyrəşmişik.
Rəsmi İrəvanın "nala- mıxa vurmas" siyasətinin perspektivi barədə Crossmedia.az-a açıqlama verən politoloq Asif Nərimanlı deyib ki, Ermənistan baş naziri Nikol Paşinyan Azərbaycan-Ermənistan sülh sazişi mətninin razılaşdırılması xəbərini Rusiya Prezidenti Vladimir Putinə, İran dövlət başçısı Məsud Pezaşkiana, daha sonra Fransa lideri Emmanuel Makrona verdi: "Sülh sazişinin qısa müddətdə imzalanması ilə mətndən kənar məsələləri arxa fona keçirməyə çalışan erməni baş nazirin telefon trafikinin traektoriyasının hədəfləri var. İki regional ölkənin - Rusiya və İranın dəstəyini əldə etmək və Azərbaycan qarşısında balansı xeyrinə dəyişdirmək, Fransanın timsalında Avropanın dəstəyinə nail olmaq və Parisin vasitəsilə Bakıya qarşı Qərbdən “sülh sazişinin imzalanması” çağırışlarını təşkil etmək həmin hədəflərdir.
Diplomatik addımlarla paralel olaraq, sərhəddə yenidən təxribatlara əl atmaq da beynəlxalq gündəliyi “regional sabitliyin yolu sülh sazişinin qısa müddətdə imzalanmasından keçir” istiqamətində formalaşdırmaq məqsədi daşıyır. Qarşıdakı dövrdə həm təxribatların, həm də “sazişin tezliklə imzalanması” çağırışlarının intensivliyinin artması istisna deyil".
Fatimə Məmmədova
14:53 17.03.2025
Oxunuş sayı: 393
