ABŞ rəsmisi Rusiyadan təcili Azərbaycana gəldi: 907-ci düzəliş gündəmdə, Vaşinqton Bakıdan kömək istəyir
Flightradar24 xidmətinin məlumatlarına görə, Gulfstream G650 - ABŞ prezidenti Donald Trampın xüsusi nümayəndəsi Stiv Uitkofun olduğu ehtimal edilən təyyarə Bakıya enib.
Crossmedia.az xəbər verir ki, təyyarə, Bakıdakı Heydər Əliyev Beynəlxalq Hava Limanına eniş edib.
Məlumata görə, təyyarə 14 mart gecəsi, yerli vaxtla saat 02:00-da Moskvanın Vnukovo hava limanından havaya qalxıb. Təyyarənin istiqaməti və sərnişinləri barədə dəqiq məlumatlar hələlik verilmir.
O, dünən Rusiyada idi. Bəzi iddialara görə xüsusi nümayəndəsinin ölkə prezidenti Vladimir Putinlə gözlənilən görüşü baş tutmayıb. O, tələm- tələsik Rusiyanı tərk edib və iddialara görə Azərbaycana gəlib. Bu iddialar hələ ki, rəsmi təsdiqini tapmayıb. Amam belə bir səfərin olması və onun ictimaiyyətə açıqlanmaması da mümkündür.
Sözügedən məsələ barədə Crossmedia.az-danışan politoloq Samir Hümbətov qeyd edib ki, bu səfər tanışlıq məqsədlidir: "Adətən yeni hakimiyyətlərdəki kadrların ilk səfəri tanışlıq üçün olur. Əvvəlcə region öyrənilir, sonra isə əməkdaşlıq imkanları nəzərdən keçirilir. Bununla yanaşı, əlbəttə, mümkün görüşlər zamanı digər məsələlər də müzakirə oluna bilər. Bu yaxınlarda yəhudi lobbisi Azərbaycana ABŞ-nin birbaşa dövlət yardımını qadağan edən 907-ci düzəlişin ləğvi ilə bağlı müraciət etmişdi. Bu məsələnin Bakıda müzakirə olunması mümkündür".
Ekspertin sözlərinə görə, ABŞ Rusiya-Ukrayna müharibəsinin bitməsi istiqamətində də Azərbaycandan kömək istəyə bilər: "Bakının həm Moskva, həm də Kiyevlə normal münasibətləri var. Bu baxımdan Azərbaycan müharibənin bitməsi ilə təşəbbüslərlə çıxış edə bilər. Ehtimal olunan belə təşəbbüslər, əlbəttə, ABŞ üçün də maraqlıdır".
Kənan Novruzov
19:44 14.03.2025
Oxunuş sayı: 16922
