Azərbaycan və Ermənistan arasında növbəti müharibə ehtimalı diletant yanaşmadır
Cənubi Qafqazda sülhün və sabitliyin təmin edilməsi çox vacibdir. Azərbaycan və Ermənistan arasında sülh sazişi üçün aparılan danışıqlar bu baxımdan böyük əhəmiyyət daşıyır. Ancaq Azərbaycan-Ermənistan sərhədində Avropa İttifaqının missiyasının olması bu prosesə mane ola bilər. Azərbaycan xarici işlər nazirinin müavini Elnur Məmmədov XII Qlobal Bakı Forumunda bildirib ki, Aİ missiyası mülki görünsə də, əslində kəşfiyyat fəaliyyəti ilə məşğuldur və bu, regionda sabitlik üçün risk yaradır. Onun sözlərinə görə, hətta sülh sazişi razılaşdırılsa belə, Ermənistanın silahlandırılmasının qarşısı alınmalı və bölgəyə kənar qüvvələrin müdaxiləsi olmamalıdır.
Hərbi ekspert Üzeyir Cəfərov Crossmedia.az-a verdiyi açıqlamasında bildirib ki, hələ xeyli iş görülməlidir: " Yəni ilkin razılaşmadan sonra çox işlər həyata keçirilməlidir. Azərbaycanın işğal altında olan əraziləri var ki, Ermənistan hələ də onlara nəzarət edir. Ermənistanın konstitusiyasında dəyişiklik edilməlidir".
Ü.Cəfərov bəzi maraqlı qüvvələrin “müharibə olacaq” kimi fikirləri yaymağa başladığını qeyd edib. Onun sözlərinə görə, savaş olmayacaq:
"Bu, sadəcə onların müəyyən planları pozmaq üçün dövriyyəyə buraxdığı informasiya və təbliğatdır. Bu təbliğatla müəyyən edilən işlərə mane olmaq istəyirlər. Buna baxmayaraq, biz öz işimizi davam etdirməliyik. Artıq xeyli irəliləyiş var və bu prosesə bəzi dövlətlər – istər şimaldan, istər cənubdan, istərsə də okeanın o tayından – maneə törətməsələr, Azərbaycan və Ermənistan bir araya gəlib problemi həll etməlidir.Missiyanın 2027-ci ilin fevralına qədər bölgədə qalması ilə bağlı sənəd imzalanıb. Lakin əsas məsələ missiyanın necə fəaliyyət göstərəcəyidir".
Həmsöhbətimiz hesab edir ki, növbəti savaş iddiaları əsassızdır: "Hansı müharibə? Boş söhbətdir. Ermənistanın nə gücü var ki, Azərbaycana qarşı güc işlətsin və yaxud da davamını gətirsin? Bu Ermənistanın hələ həll etmədiyi xeyli məsələləri var. Hansı müharibədən söhbət gedə bilər? Ermənistandan silah daşıyan ölkələr var, amma müharibə edən ölkə hər tərəfli hazır olmalıdır. Həm ordusu, həm də silah-sursatı hazır olmalıdır. Ermənistanda isə bunlar yoxdur. Müharibə oyuncaq deyil ki, deyəsən ki, müharibəyə başladım, onunla da yekunlaşsın. Elə şeyə mən fərqli yanaşıram".
Ekspert vurğulayıb ki, Ermənistan bu məsələləri qaldırmalı və artıq tərəflər arasında sülh sazişi imzalanmalı və müşahidə missiyası vaxtından əvvəl bölgədən çıxmalıdır: "Ermənistanın Avropa ilə münasibətləri gərginləşdirib-gərginləşdirməyəcəyini demək çətindir. Bu Ermənistanın seçimindən asılı olacaq. Lakin nəzərə alsaq ki, Ermənistana söz verən ölkələr arasında xeyli maraqlı dövlət var. Bu baxımdan düşünürəm ki, Ermənistan prosesi hələ uzadacaq".
Müsahibimiz, həmçinin Türkiyə ilə bəzi məsələlərin müzakirə olunması lazım olduğunu qeyd edib: "Türkiyə ilə Ermənistan arasında danışıqların nəticəsi də vacibdir. Çünki Türkiyənin əsas tələblərindən biri odur ki, Ermənistan Azərbaycanla münasibətləri qaydaya salsın".
Fatimə Məmmədova
17:28 14.03.2025
Oxunuş sayı: 850
