Dördüncü Azərbaycan-Belarus beynəlxalq qrant müsabiqəsinin nəticələri açıqlanıb
Azərbaycan Elm Fondunun 2024-cü il sentyabrın 16-da elan etdiyi 4-cü Azərbaycan-Belarus birgə beynəlxalq qrant müsabiqəsinin nəticələri açıqlanıb.
Crossmedia.az Fonda istinadən xəbər verir ki, müsabiqənin yekun nəticələri Azərbaycan Elm Fondu və Belarus Fundamental Tədqiqatlar Fondunun Birgə Komissiyasında müzakirə olunaraq təsdiqlənib. Nəticələrlə fondun saytından tanış ola bilərsiniz.
Müsabiqənin məqsədi Azərbaycan və Belarus alimlərindən ibarət yaradıcı kollektivlərin birgə icra edəcəyi, hər iki tərəf üçün aktual olan elmi istiqamətlər üzrə tədqiqat layihələrini dəstəkləmək, beynəlxalq elmi əməkdaşlığı təşviq etmək və müasir elmi problemlərin həlli üçün əlavə imkanlar yaratmaqdan ibarətdir.
Müsabiqə çərçivəsində fundamental və tətbiqi xarakterli, 200 min manatadək maliyyələşdirilməsinin nəzərdə tutulduğu layihələrin qəbulu sentyabrın 16-dan noyabrın 14-dək aparılıb. Layihələrin qəbulu innovativ "eQRANT" (Qrant Layihələrinin Elektron İdarəolunması Sistemi) vasitəsilə gerçəkləşdirilib.
Bu dövrdə iddiaçılara kömək göstərmək və sualları cavablandırmaq üçün Azərbaycan Elm Fondunda məsləhət seminarları təşkili olunub. Eyni zamanda, müsabiqəyə təqdim edilən layihələr elmi ekspertizadan keçirilib.
Azərbaycan Elm Fondunun icraçı direksiyası, daimi və müstəqil elmi ekspertlər layihələrin məzmununu qiymətləndirib, onların elmi səviyyəsini, icra imkanlarını, potensialını, gözlənilən nəticələrini və tətbiq perspektivlərini dəyərləndiriblər. Həmçinin maliyyələşdirilmənin məqsədəuyğunluğu və həcmi barədə rəylər, arayışlar və tövsiyələr hazırlanıb.
13:43 14.03.2025
Oxunuş sayı: 8771
