Deputat Azərbaycanda heyvanların kəsilməsi üçün yaş həddinin müəyyən edilməsini təklif edib
Son illər iri və xırda buynuzlu mal-qaranın sayı azalsa da heyvandarlıq məhsulları istehsalı xeyli artmışdır. Dövlət mal-qaranın sayının artmasında deyil, ətlik və südlük heyvanların yetirilməsində maraqlıdır. Bu, düzgün seçimdir və iri heyvandarlıq təsərrüfatların yaradılması, cinslərin yaxşılaşdırılması günün tələbidir
Crossmedia.az xəbər verir ki, bunu Milli Məclisin Aqrar siyasət komitəsinin sədri Tahir Rzayev bu gün keçirilən plenar iclasda Nazirlər Kabinetinin 2024-cü ildə fəaliyyəti haqqında hesabatının müzakirəsi zamanı çıxışında deyib.
Millət vəkili bildirib ki, ancaq 7-8 kiloluq quzuların, körpə danaların kütləvi kəsimi və bazara çıxarılması heyvandarlığın inkişafına maneədir və bazarda ətin qiymətinin artmasına səbəbdir.
“Təhlillər göstərir ki, orta kəsim çəkisinin 2 kq az olması illik qoyun əti istehsalında 8 min ton itki deməkdir. Bizdə kəsim çəkisi normadan nəinki 2, hətta çox vaxt 10-12 kq azdır. Qardaş Türkiyədə və digər ölkələrdə olduğu kimi bizdə də heyvanların kəsilməsi üçün yaş həddinin müəyyən edilməsi, qadağaların qoyulması və həddi pozanlar üçün cərimələrin tətbiq olunması yaxşı olar.
Son illər satışa mənşəyi bilinməyən ətin, adlarını çəkmək istəmirəm çıxarılması kütləvi zəhərlənmələrə, müəyyən xəstəliklərə səbəb olur və insanlarda ciddi narahatçılıq yaradır. Ətin satışına qadağalar olmadığı üçün işbazlar bundan sui-istifadə edirlər. Ənənəvi olmayan, yeyilməyən heyvan ətlərinin siyahısının hazırlanmasına və satışının qadağan edilməsinə ehtiyac var”, - deyə komitə sədri qeyd edib.
13:39 14.03.2025
Oxunuş sayı: 2803
