Bakıda maliyyə nəzarəti və konstitusion hüquqlar mövzusunda konfrans keçirilib
Auditorlar Palatası, Azərbaycan Dövlət İqtisad Universiteti (UNEC) və Azərbaycan İqtisadçılar İttifaqının birgə təşkilatçılığı ilə “Konstitusiya və Suverenlik İli”nə həsr edilmiş “Maliyyə nəzarəti - dövlətin və özəl sektorun konstitusion hüquqlarının qorunmasının təminatçısı kimi” mövzusunda konfrans keçirilib.
Crossmedia.az xəbər verir ki, konfransda açılış nitqi ilə çıxış edən Azərbaycan Dövlət İqtisad Universitetinin (UNEC) rektoru Ədalət Muradov tədbirin əhəmiyyətindən bəhs edib və konfransın işinə uğurlar arzulayıb.
Tədbirdə İqtisadiyyat Nazirliyi yanında Dövlət Vergi Xidmətinin rəisi Orxan Nəzərli “Vergi islahatlarının maliyyə nəzarətinin gücləndirilməsinə və özəl sektorda uçot sisteminin bərpasına təsiri, Dövlət Gömrük Komitəsinin sədr müavini Natiq Şirinov “Rəqəmsal gömrük: Ticarətin asanlaşdırılması və büdcə dayanıqlılığı kontekstində”, Maliyyə Monitorinqi Xidmətinin İdarə Heyətinin sədrinin müavini Azər Abbasov “ƏL/TMM-ə qarşı mübarizə ölkənin maliyyə təhlükəsizliyinin mühüm amili kimi”, Azərbaycan Dövlət İqtisad Universitetinin (UNEC) rektoru Ədalət Muradov “Maliyyə təhlükəsizliyi və kadr hazırlığına yeni dövrün çağırışları”, Azərbaycan Respublikası Milli Məclisinin deputatı, Azərbaycan İqtisadçılar İttifaqının sədri Ziyad Səmədzadə “Azərbaycan Respublikasında maliyyə nəzarətinin qanunvericilik bazası və onun təkmilləşdirilməsi məsələləri”, Auditorlar Palatasının sədri Vahid Novruzov “Audit konstitusiya və suverenlik zəminində”, Elm və Təhsil Nazirliyi İdarəetmə Sistemləri İnstitutunun şöbə müdiri, AMEA-nın müxbir üzvü Qorxmaz İmanov “Süni intellektin maliyyə nəzarətində istifadə imkanları”, Azərbaycan Dövlət İqtisad Universitetinin (UNEC) “Maliyyə və audit” kafedrasının müdiri Əvəz Ələkbərov “Maliyyə şəffaflığı, elm və praktikanın vəhdəti: müasir çağırışlar”, Azərbaycan Respublikası Hesablama Palatasının şöbə müdiri Zaur Vəliyev “İqtisadi təhlükəsizliyin təmin edilməsində dövlət auditinin rolu”, Azərbaycan Respublikası Auditorlar Palatasının Şura üzvü, sərbəst auditor Altay Cəfərov “Özəl sektorun dayanıqlı inkişafında və qanuni mənafelərin qorunmasında auditin rolu”, Azərbaycan İqtisadçılar İttifaqının sədr müavini, Azərbaycan Dövlət İqtisad Universitetinin (UNEC) dosenti Elşad Səmədzadə “Maliyyə nəzarəti konstitusiya hüquqlarının keşiyində”, Auditorlar Palatasının üzvü, “SR Audit Solutions” MMC-nin direktoru Səftər Vəlizadə “Qanunsuz yolla əldə olunmuş əmlakın leqallaşdırılmasına qarşı mübarizədə müstəqil auditin rolu və vəzifələri”, “Bakı Metropoliteni” QSC-nin Daxili audit departamentinin rəisi Elvin Hacıyev “Dövlət investisiya layihələrinin səmərəliliyinin təmin olunmasında maliyyə nəzarətinin rolu” mövzularında məruzələrlə çıxış ediblər.
Konfransda dövlət qurumlarının nümayəndələri, Azərbaycan Dövlət İqtisad Universitetinin (UNEC) professor-müəllim heyəti, Auditorlar Palatasının üzvləri və kollektivi, Azərbaycan İqtisadçılar İttifaqının nümayəndələri iştirak ediblər.
18:38 13.03.2025
Oxunuş sayı: 6935
