Azərbaycan-Türkiyə əməkdaşlığı dərinləşir - ŞƏRH
Martın 5-də Azərbaycan Prezidenti İlham Əliyev və həmkarı Rəcəb Tayyib Ərdoğanın iştirakı ilə İğdır-Naxçıvan qaz kəmərinin açılış mərasimi keçirilib. Bu qaz kəməri layihəsi Azərbaycan və Türkiyə arasında enerji sahəsindəki əməkdaşlığın daha da güclənməsinə eyni zamanda, regionun enerji təhlükəsizliyinin təmin olunmasına mühüm töhfə verəcəkdir. Layihə “bir millət, iki dövlət” olan Azərbaycan və Türkiyənin möhkəm dostluq, strateji tərəfdaşlıq əlaqələrinin bariz nümunəsidir.
Mövzu ilə bağlı Crossmedia.az-a danışan Milli Məclisin deputatı Könül Nurullayeva bildirib ki, Azərbaycan-Türkiyə əməkdaşlığı günbəgün dərinləşir: “İki qardaş ölkənin reallaşdırdığı ortaq layihələr regionun rifahı ilə yanaşı təhlükəsizliyini də təmin edir. Bu günlərdə istifadəyə verilən “İğdır – Naxçıvan” qaz kəməri də bu mənada əhəmiyyət kəsb edir. Qaz xətti Azərbaycan-Türkiyə qardaşlığının rəmzlərindən biridir. Bu cür yeni enerji bağları ilk növbədə ikitərəfli əlaqələrin inkişafını daha da gücləndirir. Müasir dünyada və geosiyasi reallıqlar şəraitində Azərbaycan-Türkiyə qardaşlığının və müttəfiqliyinin əhəmiyyəti getdikcə artır. Bakı və Ankaranın ortaq iradəsi sayəsində çoxsaylı layihələr realaşmaqdadır. Bakı-Tbilisi-Ceyhan, Bakı-Tbilisi-Ərzurum və TANAP Boru kəməri layihələrinin əhəmiyyəti cənab Prezidentin Ankaraya səfəri zamanı bir daha vurğulandı".
Deputatın sözlərinə görə, Azərbaycandan Türkiyə ərazisindən gedən qaz bir çox ölkələrin enerji təhlükəsizliyini təmin etməsi təsadüfü deyil: “Türkiyə və Azərbaycan həm Avropanın, həm də dünyanın təchizat təhlükəsizliyinə töhfə verəcək layihələri davam etdirirlər. Beləliklə, Naxçıvan sakinlərinin təbii qaza ehtiyacı İğdır üzərindən qarşılanacaq. Eyni zamanda İğdır sakinləri də bundan yararlanacaq. Beləliklə, Naxçıvanın təbii qaz ehtiyacı ən azı 30 il müddətinə təmin ediləcək. Həmçinin, Naxçıvan coğrafi nöqteyi-nəzərdən vacib bölgədir. Məlumdur ki, Ermənistanın Naxçıvana qarşı iddiaları hər zaman olub. Bu səbəbdən dövlət başçısı İğdır-Naxçıvan qaz kəmərinin açılışı zamanı bu məsələyə xüsusi toxunub. Naxçıvanın təhlükəsizliyi, demək olar ki, bütün bölgənin təhlükəsizliyi deməkdir. Yeni qaz kəməri isə Muxtar respublikanın enerji təhlükəsizliyini təmin edəcək”.
Könül Nurullayeva Prezident İlham Əliyevin də bəyan etdiyi kimi, Naxçıvanın Azərbaycanla Türkiyəni birləşdirən yeganə quru əlaqəsi olmaqla yanaşı, həm də türk dünyasının qovuşduğu məkan olduğunu vurğulayıb: “İğdır-Naxçıvan Təbii Qaz Boru Kəməri Naxçıvanın enerji təhlükəsizliyinin şaxələndirilməsində strateji əhəmiyyətə malikdir. Türkiyə Prezidenti də bu layihəni “Naxçıvanla ortaq taleyimizin simvolu” kimi xarakterizə etdi. İğdır-Naxçıvan Təbii Qaz Boru Kəməri üzrə ilk müqavilə 2010-cu ildə imzalanıb. Azərbaycan qazını Türkiyəyə daşıyan Cənubi Qafqaz Boru Kəməri genişləndirildikdən və nəql imkanları artırıldıqdan sonra 2020-ci ildə təbii qazın Türkiyə üzərindən Naxçıvana çatdırılması məsələsi yenidən gündəmə gəldi. Beləliklə, bu təbii qaz kəmərinin reallaşmasıi enerji təhlükəsizliyi baxımından bir növ diversifikasiya imkanlarını genişləndirmiş oldu. İğdır-Naxçıvan qaz kəməri də daxil olmaqla Azərbaycanla Türkiyənin birgə reallaşdırdığı ortaq layihələr ikitərəfli əlaqələri möhkəmləndirməklə yanaşı, regionun inkişafına da töhfə verir. Türk dünyasının da imkanlarını genişləndirir. Cənab Prezdientin də söylədiyi kimi, “bizim işbirliyimiz səmimidir, biz hamımız qardaşıq, biz hamımız ənənəvi dəyərlər üzərində ölkələrimizi inkişaf etdiririk və bu birlik, qardaşlıq gündən-günə möhkəmlənir",- deyən ekspert fikrini yekunlaşdırıb.
Nəzrin Salmanova
09:46 07.03.2025
Oxunuş sayı: 8452
