İsrailin dron istehsalçısı müharibəni kompüter oyununa bənzədib
İsrailin pilotsuz uçuş aparatları istehsal edən “Xtend” şirkətinin rəhbəri Aviv Şapira hərbi texnologiyalar sahəsində son məqsədlərinin “Enderin oyunu” (“Ender's Game”) elmi-fantastik əsərində təsvir edilən idarəetmə modelinə nail olmaq olduğunu bildirib.
Crossmedia.az xəbər verir ki, ABŞ-nin “Vanity Fair” nəşri bu barədə araşdırma dərc edib.
Məlumata görə, Şapira şirkətin gələcəyini hərbçilərin eyni vaxtda çoxsaylı dronları məsafədən idarə edə bildiyi sistemlə əlaqələndirir.
Onun şirkətinin ofislərində “Enderin oyunu” romanı əsasında çəkilmiş filmin afişalarının yerləşdirildiyi bildirilir.
Əsərdə baş qəhrəman Ender Viqqin hərbi əməliyyatları simulyasiya oyunu hesab edərək idarə edir. Lakin sonradan onun məhv etdiyi hədəflərin virtual deyil, real olduğunu öyrənir.
Şapiranın qardaşı isə İsrail ordusu ilə əməkdaşlıq barədə başqa bir müsahibəsində belə deyib:
“Biz mahiyyət etibarilə özümüzü riskə atmadan pis adamları necə məğlub etməyi göstərən kompüter oyunu yaratdıq”.
Nəşr qeyd edir ki, “Xtend” şirkətinin inkişaf etdirdiyi texnologiyalar hərbçilərə döyüş bölgəsinə birbaşa daxil olmadan pilotsuz uçuş aparatları vasitəsilə əməliyyatlar həyata keçirməyə imkan verir.
Bu yanaşma müharibədə texnologiyaların istifadəsi, məsafədən idarə olunan silahların etik tərəfləri və ölümcül qərarlara görə məsuliyyət məsələlərini gündəmə gətirir.
18:50 23.10.2026
Oxunuş sayı: 56
