Rusiya Avropaya açıq mesaj verdi: "Ukraynada hərbi hissələrin yerləşdirilməsi qəbuledilməzdir"
Rusiya Xarici İşlər Nazirliyinin sözçüsü Mariya Zaxarova Moskvada keçirdiyi mətbuat konfransında Ukrayna münaqişəsi, Qərbin sanksiya siyasəti və Avropanın hərbi strategiyası ilə bağlı sərt bəyanatlar verib.
Crossmedia.az xarici mediaya istinadən xəbər verir ki, o, Ukraynada Avropa bayraqları altında hərbi qüvvələrin yerləşdirilməsini qəbuledilməz adlandıraraq, bu addımın gərginliyi daha da artıracağını vurğulayıb.
Zaxarova ABŞ-lə Ukrayna böhranının sülh yolu ilə həlli üçün danışıqlara hazır olduqlarını, lakin bunun üçün Vaşinqtonun rəsmi nümayəndə təyin etməsinin vacib olduğunu bildirib. O, Fransa prezidenti Emmanuel Makronun "Rusiya Avropa ilə mübarizəyə hazırlaşır" iddiasını "yalan tezislər" adlandırıb və Qərbin Rusiya maraqlarını nəzərə almamasının böhranın əsas səbəblərindən biri olduğunu söyləyib.
Bundan əlavə, Zaxarova Ukraynanın "Türk axını" qaz boru kəmərinə hücumuna Aİ-nin susqunluğunu tənqid edib və Avropanın enerji təhlükəsizliyinin real risk altında olduğunu qeyd edib. O, həmçinin Almaniyanın Rusiya Könüllülər Korpusuna göz yummasını "odla oynamaq" kimi dəyərləndirib və bunun Almaniya üçün ciddi nəticələr doğura biləcəyini bildirib.
Zaxarova Fələstin-İsrail münaqişəsinə də toxunaraq, iki dövlət prinsipinə əsaslanan həll yolunu dəstəklədiklərini və Qəzzanın yenidən qurulması planını dəstəklədiklərini vurğulayıb.
21:59 06.03.2025
Oxunuş sayı: 9294
