Əməkdar jurnalist: "Ümid edirəm, Azərbaycanda idman jurnalistikası daha da inkişaf edəcək"
Azərbaycanda 5 Mart – Bədən Tərbiyəsi və İdman Günü hər il geniş şəkildə qeyd olunur. Bu əlamətdar gün Prezident İlham Əliyevin 2005-ci il 4 mart tarixli Sərəncamı ilə təsis edilib. Bu qərar ölkədə idmanın və bədən tərbiyəsinin inkişafına göstərilən dövlət qayğısının bariz nümunəsidir. Bu gün həm də peşəkar idmançılarla yanaşı, idman müəllimləri, məşqçilər və idman jurnalistləri üçün əhəmiyyətlidir. Onlar idmanın inkişafında mühüm rol oynayırlar.
Əməkdar jurnalist, Fəxri Bədən Tərbiyəsi və İdman işçisi, idman mütəxəssisi Oqtay Bayramov ölkədə idmanın və idman mətbuatının cari durumu barədə Crossmedia.az-a müsahibə verib.
-İdmanın cəmiyyət həyatında rolunu necə qiymətləndirirsiniz?
-İdman cəmiyyətin sağlamlıq və gümrahlıq mənbəyidir. Prezident İlham Əliyevin 2005-ci il 4 mart tarixli Sərəncamı ilə hər il martın 5-i Azərbaycanda Bədən Tərbiyəsi və İdman Günü kimi qeyd olunur. Bu gün həm də gənclik və sağlamlıq bayramı hesab edilir. Respublikanın müxtəlif yerlərində bu tarixə həsr olunmuş yarışlar və tədbirlər təşkil olunur. Gənclər bu tədbirlərdə yüksək fəallıqla iştirak edirlər. Azərbaycan artıq neçə illərdir ki, idman ölkəsi kimi tanınır. İdmanın ölkədə geniş yayılması günümüzün tələbinə çevrilib. Bədən tərbiyəsi və idman məşğələləri həyatımızın ayrılmaz bir hissəsi olmaqla, gənclərin fiziki inkişafına töhfə verir və onlarda bir çox müsbət keyfiyyət formalaşdırır.
-Azərbaycanda idmanın inkişafı hansı səviyyədədir?
-Respublikanın hər yerində idmana dövlət tərəfindən xüsusi qayğı göstərilir. Ümummilli lider Heydər Əliyev uzun illər ərzində idmanın inkişafına böyük diqqət yetirib. O, çıxışlarının birində qeyd etmişdir ki, gənclərə və idmanın inkişafına xüsusi qayğı göstərmək onun birbaşa vəzifəsidir. Bu qayğı illər keçdikcə daha da genişlənib və ölkəmizdə idman sürətlə inkişaf edib. Azərbaycan dünyada beynəlxalq idman tədbirlərinin keçirildiyi nüfuzlu ölkələrdən biridir. Ölkəmizdə dünya və Avropa çempionatları, olimpiya oyunlarına lisenziya xarakterli turnirlər kimi mötəbər yarışlar təşkil edilir. Xüsusilə 2015-ci ildə Bakıda keçirilən ilk Avropa Oyunları Azərbaycanın idman ölkəsi kimi tanınmasına böyük töhfə verib. Həmin oyunlarda yüksək səviyyəli təşkilatçılıq nümayiş etdirilib və Azərbaycan Avropa Oyunlarının vətəni kimi tanınıb. Azərbaycan idman infrastrukturuna da böyük sərmayə yatırır. 1997-ci ildən Azərbaycan Milli Olimpiya Komitəsinə rəhbərlik edən Prezident İlham Əliyevin bu sahəyə göstərdiyi dəstək xüsusi qeyd olunmalıdır. O, idmançılarla tez-tez görüşlər keçirir, onların uğurlarını yüksək qiymətləndirir və mötəbər yarışlarda qazandıqları qələbələrdən sonra onları qəbul edərək təbrik edir. Bu da idmanın inkişafına müsbət təsir göstərir.
-Azərbaycanda idman mətbuatının hazırkı durumu sizi qane edirmi?
-İdman mətbuatı idman yarışlarını geniş şəkildə işıqlandırır. Gənc jurnalistlər müxtəlif yarışları mümkün qədər operativ şəkildə təqdim etməyə çalışırlar. Mən onlara uğurlar arzulayıram və onların gələcək fəaliyyətlərində daha da operativ və peşəkar olmalarını istəyirəm.İdman mətbuatının ölkəmizdə idmanın inkişafına verdiyi töhfə önəmlidir. Bu sahədə çalışan jurnalistlər idman tədbirlərini yüksək səviyyədə işıqlandırmaqla idmanın populyarlaşmasına kömək edirlər. Əsas odur ki, bu istiqamətdə fəaliyyət daha da genişləndirilsin və idman jurnalistikası daha peşəkar səviyyəyə yüksəlsin.
-Azərbaycan mətbuatının 150 illiyi münasibətilə idman jurnalistikasında hansı dəyişiklikləri görmək istərdiniz? İdmançılara və idman jurnalistlərinə arzularınız nələrdir?
-Azərbaycan mətbuatının 150 illiyi çox şərəfli bir tarixdir. Bu əlamətdar gün münasibətilə bütün mətbuat nümayəndələrinə, o cümlədən idman jurnalistlərinə uğurlar arzulayıram. Ümid edirəm ki, bu bayram yüksək səviyyədə qeyd ediləcək və mətbuatda idmanın inkişafına həsr olunmuş dəyərli yazılar dərc olunacaq. Uzun illər idman mətbuatında çalışmışam və bu sahədə dəyərli jurnalistlər – Mirpaşa Miriyev, Aqşin Kazımzadə, Oqtay Atayev, Xədicə Orduxanova, Paşa Əmirov kimi peşəkarlarla birgə fəaliyyət göstərmişəm. O illərdə qoyulan təməl sonralar daha da möhkəmləndi və bu gün də inkişaf edib. Bu sahədə çalışan gənc jurnalistlərə qarşıdan gələn bayram münasibətilə uğurlar arzulayıram. Ümid edirəm ki, onlar idman jurnalistikasını daha da inkişaf etdirəcək və ölkəmizdə idmanın tanıdılmasına öz töhfələrini verəcəklər.
Xumar Əhmədova
15:10 05.03.2025
Oxunuş sayı: 3719
