Hakan Fidan: İrana yeni hücum müharibəni genişləndirə bilər
Türkiyənin xarici işlər naziri Hakan Fidan İrana yenidən hücumun regionda müharibə və münaqişələri genişləndirə biləcəyi barədə ölkələr arasında ortaq mövqenin olduğunu bildirib.
Crossmedia.az xəbər verir ki, Türkiyə Xarici İşlər Nazirliyi bu barədə məlumat yayıb.
Hakan Fidan bu açıqlamanı İstanbulda Türkiyə, Misir, Pakistan, Səudiyyə Ərəbistanı, İtaliya, Böyük Britaniya, Almaniya və Fransanın iştirakı ilə keçirilən R4 və R4+E3 xarici işlər nazirlərinin görüşlərindən sonra təşkil olunan mətbuat konfransında verib.
Hakan Fidan bildirib ki, görüşdə iştirak edən ölkələr müharibənin həm Fars körfəzində, həm də Ukraynada mümkün qədər tez dayandırılmasını və atəşkəsin əldə olunmasını dəstəkləyirlər. Onun sözlərinə görə, bütün tərəflər diplomatiya və dialoqun problemlərin həlli üçün ən doğru yol olduğu barədə razılığa gəliblər.
Nazir vurğulayıb ki, İrana qarşı hərbi müdaxilə problemin həlli deyil və hazırda heç bir iştirakçı ölkə bunu dəstəkləmir. O, Hörmüz boğazının mümkün qədər tez açılmasının və bunun dünya bazarlarına mənfi təsirlərinin aradan qaldırılmasının vacibliyini də qeyd edib.
Rusiya-Ukrayna müharibəsinə toxunan Hakan Fidan iştirakçı ölkələrin Ukraynada qısa müddətdə atəşkəsə nail olunmasını və bunun əsasında sülh sazişinin imzalanmasını istədiklərini bildirib.
Nazir əlavə edib ki, atəşkəsə nail olunmadığı təqdirdə, Qara dənizdə gəmiçilik təhlükəsizliyinin və sərbəst hərəkətin təmin edilməsi istiqamətində addımlar atılmalıdır.
23:21 23.10.2026
Oxunuş sayı: 50
