Politoloq: ABŞ Ukraynanı sülhə məcbur edə bilər
ABŞ-nin Rusiya və Ukrayna üzrə xüsusi elçisi Kit Kelloq bildirib ki, ABŞ Ukrayna Prezidenti Volodimir Zelenskini Rusiya ilə sülh razılaşmasına məcbur etməyəcək.
NATO qərargahında çıxış edən Kelloq bu həftə Kiyevə səfər edəcəyini və Zelenski ilə görüşəcəyini qeyd edib. O əlavə edib ki, Avropa müttəfiqləri danışıqlara qoşulmağa çalışır, lakin hamını danışıqlar masasına oturtmaq mümkün deyil.
Bu barədə Crossmedia.az-a danışan politoloq Samir Hümbətov bildirib ki, ABŞ Kiyevi birbaşa sülhə məcbur etməsə də, yardımları dayandırmaqla istədiyi nəticəni almağa çalışa bilər.
“ABŞ açıq şəkildə "sülh müqaviləsini imzala" deməyəcək, amma yardımları – hərbi, iqtisadi və humanitar dəstəyi – kəsə bilər. Yəni, "Ya sülh bağlayırsan, ya da yardımlardan məhrum olursan" mesajını verə bilər. ABŞ və Rusiya müəyyən mənada pərdə arxasında danışıqlar aparırdı və burada hansısa razılaşmalar ola bilərdi”, – deyə politoloq qeyd edib.
Onun sözlərinə görə, bu məsələdə Qərbi Avropa ölkələrinin, xüsusilə Britaniyanın mövqeyi vacib olacaq:
“Avropa ölkələri bu razılaşmaya imkan verəcəkmi? Çünki bu, onlar üçün strateji və milli təhlükəsizlik məsələsidir. Ona görə də yekun razılığın olub-olmayacağı hələ sual altındadır. ABŞ isə ehtiyatlı davranmağa çalışır və yardımları dayandırmaqla istədiyi nəticəni almaq istəyir”.
Fatimə Məmmədova
16:47 18.02.2025
Oxunuş sayı: 11617
