ABŞ Ukraynaya silah tədarükünü bərpa etdi: Trampın planı nədir? - ŞƏRH
ABŞ Ukraynaya silah və hərbi texnika tədarükünü yenidən bərpa edib. Bu barədə “Reuters” agentliyi mənbələrə istinadən məlumat yayıb. Bildirilir ki, tədarük ötən həftənin sonunda bərpa olunub. Məlumata görə, Donald Tramp administrasiyası əvvəlcə Kiyevə silah tədarükünü tamamilə dayandırmaq ehtimalını nəzərdən keçirib. Lakin hazırda Ağ Evdə Ukraynaya hansı həcmdə yardım göstəriləcəyi ilə bağlı fikir ayrılıqları mövcuddur. Rəsmi Vaşinqton bu məsələ ilə bağlı hələlik şərh verməyib.
Mövzu ilə bağlı politoloq Əziz Əlibəyli Crossmedia.az-a açıqlamasında bildirib ki, ABŞ-ın əsas strategiyası hərbi əməliyyatlardan çox, maliyyə vasitəsilə qlobal hakimiyyətə nail olmaqdır: “Əslində, ABŞ-nin əsas strategiyası müharibələrlə deyil, maliyyə vasitəsilə dünya hakimiyyətinə nail olmaqdır. Düşünürəm ki, bu, ağıllı bir yanaşmadır və praktik olaraq özünü Trampın birinci hakimiyyəti dövründə də göstərmişdir. Digər tərəfdən, heç bir şübhə yoxdur ki, Azərbaycan da bu prosesin gedişatını izləyir. Eyni zamanda, Trampın Rusiya ilə apardığı danışıqların və verilən mesajların nəticələri gözlənilir. Bu baxımdan, əsas sual ondan ibarətdir ki, mövcud resurslar və insan faktoru nəzərə alınmaqla, proses hakimiyyətin formalaşmasına necə təsir edəcək?”
Hazırda ABŞ-nin Ukraynaya hərbi dəstəyi və Rusiya ilə münasibətləri dünya siyasətinin əsas mövzularından biri olaraq qalır. Tramp administrasiyasının bu istiqamətdə atacağı addımlar isə beynəlxalq arenada ciddi müzakirələrə səbəb olur.
Maral Şahverdili
18:55 06.02.2025
Oxunuş sayı: 6497
