Paşinyan ABŞ- dən istədiyini almadı: Vaşinqtondan İrəvana "tərs şillə"
Ermənistan baş naziri Nikol Paşinyan Vaşinqtonda Atlantik Şurasında keçirdiyi görüşlərdə region ölkələri ilə münasibətlər, sülh prosesi ilə bağlı müzakirələr aparıb. Lakin Paşinyan burada gözlənilməz sürprizlə qarşılaşıb. Müzakirələr apardığı, debatlara qatıldığı bir dönəmdə Atlantik Şurasının saytında Azərbaycanla bağlı geniş məqalə dərc edib. Şübhəsiz ki, dünyanın nüfuzlu beyin mərkəzi olan Atlantik Şurası tərəfindən dərc olunan məqalə Tramp administrasiyasının Azərbaycanla münasibətlərə böyük önəm verməsinin göstəricisi hesab oluna bilər.
Bəs Tramp administrasiyasının Azərbaycanla inkişaf edən münasibəti Ermənistana münasibəti necə olacaq?
Mövzu ilə bağlı Milli Məclisin deputatı Aydın Hüseynov Crossmedia.az-a açıqlama verib:
“Keçmiş ABŞ prezidenti Cozef Baydendən fərqli olaraq yeni dövlət başçısı Donald Trampın birinci prezidentlik dövründə Azərbaycan-ABŞ münasibətləri normal şəkildə idi. Xüsusilə, Tramp Azərbaycanın meqa-layihələrinə, həm orta dəhliz, həm də cənub qaz dəhlizi layihəsində Azərbaycana dəstək verib. Hesab edirəm ki, Tramp bundan sonra da Azərbaycanla əməkdaşlığı daha da genişləndirəcək. Çünki bu ölkə prezidentinin açıqlamalarında da öz əksini tapıb. Digər tərəfdən isə təbii ki, ABŞ-nin də öz maraqları var”.
Deputat Ermənistanın ABŞ ilə tərəfdaş ola bilməyəcəyindən danışıb:
“Ermənistan baş nazirinin ABŞ-yə getməyinin əsas məqsədi Trampla görüş idi. Bu, alınmadı. ABŞ Ermənistanı iqtisadi baxımdan özünə tərəfdaş kimi görmür. Çünki Ermənistan regionda heç bir iqtisadi potensiala malik deyil. Bununla belə, Ermənistandan digər ölkələrə, xüsusilə Rusiyaya qarşı istifadə etməyə çalışacaq. Bu addımları atmaq üçün Ermənistanla hansı formadasa münasibət yarada bilər. Ümumi strateji baxımdan isə qeyd etdiyimiz kimi ABŞ Azərbaycana marağı daha da artıracaq. Çünki Azərbaycan regionda iqtisadi-siyasi və hərbi baxımdan güc mərkəzidir. Regionda heç bir məsələ Azərbaycanın iştirakı və razılığı olmadan reallaşa bilməz”.
Ayhan Ağarzayev
16:52 06.02.2025
Oxunuş sayı: 7771
