Trampın Qəzza planı ərəb dünyasını qarışdırdı - ŞƏRH
ABŞ-nin prezidenti Donald Trampın Qəzza zolağındakı fələstinli qaçqınların Misir və İordaniyaya köçürülməsi ilə bağlı təklifi ərəb dünyasında ciddi narazılığa səbəb olub. Misir və İordaniya rəhbərləri bu ideyanı qətiyyətlə rədd edərək, milli maraqlara və fələstinlilərin hüquqlarına zidd olduğunu bildiriblər.
Misirdə Rəfah sərhəd keçid məntəqəsi yaxınlığında minlərlə insanın iştirakı ilə keçirilən etiraz aksiyalarında Misir və Fələstin bayraqları qaldırılıb, “Yaşasın Misir” şüarları səsləndirilib. Misir prezidenti Əbdülfəttah əs-Sisi bildirib ki, ölkəsi Qəzzadan qaçqın qəbul etməyəcək. İordaniya isə onsuz da milyonlarla fələstinli qaçqına ev sahibliyi etdiyini və yeni qaçqın dalğasının ciddi problemlər yaradacağını vurğulayıb.
Politoloq Əlimusa İbrahimov Crossmedia.az-a açıqlamasında bildirib ki, “ABŞ PrezidentinDonald Tramp İsrail-Həmas qarşıdurmasının atəşkəs və sülhlə nəticələnməsi istiqamətində ciddi addımlar atır. Amma bu addımların hamısını region dövlətləri müsbət qatşılamır. Misal üçün, İsraillə Həmas arasında atəşkəsin əldə olunması, girov və həbsxanadakıların azad olunmasını region ölkələri müsbət qarşıladısa, Qəzzadakı əhalinin Misir və İordaniyaya göndərilməsi ideyası ciddi narazılıq yaratdı”.
Politoloq bildirib ki, Qəzza əhalisi ilə yanaşı, Misir və İordaniya hakimiyyətləri də Trampın bu təklifinə qarşı çıxıb: Xüsusilə, Misirdə Rəfah sərhəd keçid məntəqəsi yaxınlığında minlərlə insanın iştirakı ilə etiraz aksiyası keçirilib. Misir Prezidenti Əbdülfəttah əs-Sisi bəyan edib ki, Misir Qəzzadan qaçqın qəbul etməyəcək və bu məsələdə xalqın da rəyinin eyni olduğunu vurğulayıb. Etirazçılar Misir və Fələstin bayraqları qaldıraraq, “Yaşasın Misir” şüarları səsləndiriblər. Ərəb ölkələri bu ideyanın Netanyahu hökumətindən gəldiyinə əmindir".
Ə.İbrahimov qeyd edib ki, İsrailin Baş Naziri 15 aylıq müharibə başlayan kimi bu məsələni ortaya atmışdı: " Sadəcə Bayden administrasiyası Netanyahunu dəstəkləmədiyinə görə ideya göydən asılı qaldı. Trampın yenidən vəzifəyə gəlməsindən ruhlanan İsrail köçürmə məsələsini bu dəfə Trampın dili ilə yenidən ortaya qoydu. Tramp isə təklifini müdafiə edərək, ABŞ-nin Misir və İordaniyaya böyük həcmdə yardım göstərdiyini xatırladıb və bu ölkələrin fələstinli qaçqınları qəbul etməli olduğunu bildirib. Fələstinlilərin Qəzzanı - müstəqil dövlətin bir hissəsinə çevriləcəyinə ümid etdikləri ərazini tərk etmələri ilə bağlı hər hansı təklif nəsillər boyu Fələstin rəhbərliyinə nifrət aşılayıb və 2023-cü ilin oktyabrında Qəzza müharibəsi başlayandan bəri qonşu ərəb dövlətləri tərəfindən dəfələrlə rədd edilib. İordaniyada isə artıq bir neçə milyon fələstinli yaşayır. Yenidən qaçqınların ora köçürülməsi bu ölkə üçün ciddi problemlər deməkdir. Beləliklə, Trampın Qəzza qaçqınlarını bölgə ölkələrinə köçürmə planı geniş etirazlarla qarşılanıb. Ərəb dünyası bu ideyanı qəbulolunmaz hesab edir".
Maral Şahverdili
14:57 01.02.2025
Oxunuş sayı: 7184
