Su təchizatında rəqəmsal inqilab: Vətəndaşları nələr gözləyir?
Azərbaycan Dövlət Su Ehtiyatları Agentliyinin təşkilatçılığı ilə “Su şəbəkələrinə qoşulma” işçi qrupunun növbəti iclası keçirilib. Görüşdə su şəbəkəsinə qoşulma prosesinin sadələşdirilməsi, tariflərin optimallaşdırılması və bu sahədə həyata keçirilən layihələrin icra vəziyyəti müzakirə edilib. Tədbirdə biznes nümayəndələri, dövlət qurumlarının rəsmiləri və digər maraqlı tərəflər iştirak edib.
Crossmedia.az xəbər verir ki, Azərbaycan Dövlət Su Ehtiyatları Agentliyinin Monitorinq sektorunun müdiri Yusif Əhədi çıxışında, 2024-cü il üçün təsdiqlənmiş yol xəritəsi çərçivəsində yeddi əsas istiqamət üzrə 23 tədbirin icrasının nəzərdə tutulduğunu bildirib. Onun sözlərinə görə, bu layihələrin əksəriyyəti artıq uğurla başa çatdırılıb. Avtomatlaşdırma və elektronlaşdırma işlərinin dünya standartlarına uyğun icra edildiyini vurğulayan Yusif Əhədi bu yeniliklərin gələcəkdə vətəndaşlar üçün əhəmiyyətli dərəcədə asanlıq yaradacağını qeyd edib.
O, həmçinin tikinti və quraşdırma işlərinin vaxtında tamamlanması üçün tələb olunan tədarük zəncirinin daha səmərəli planlaşdırıldığını, bu sahədə qalan məsələlərin 2025-ci ilin əvvəlində həll ediləcəyini bildirib.
Görüşdə iştirakçılar arasında əməkdaşlığın genişləndirilməsi, məlumatlandırma və maarifləndirmə işlərinin artırılması barədə də fikir mübadiləsi aparılıb. Tədbir su şəbəkəsinin təkmilləşdirilməsi ilə bağlı islahatların gələcəkdə daha da sürətləndirilməsini hədəfləyir.
Maral Şahverdili
Nihat Tahirov
15:50 30.01.2025
Oxunuş sayı: 10461
