Ukrayna müdafiə naziri vəzifəsindən azad oluna bilər: “Zelenskiyə deyib ki...”

Ukrayna Nazirlər Kabineti ölkənin müdafiə nazirinin müavini Dmitri Klimenkovun vəzifədən azad edilməsi ilə bağlı qərar qəbul edib. Klimenkov bu vəzifəyə 2022-ci il oktyabrın 5-də təyin olunmuşdu. O, Ukrayna ordusunun silahlanması, hərbi texnika və digər zəruri vasitələrin idxalı məsələlərinə cavabdeh şəxs olub. Bu qərar Ukrayna Müdafiə Nazirliyində daha geniş struktur dəyişikliyinin bir hissəsi olaraq qiymətləndirilir.

Ukrayna Müdafiə Nazirliyində islahatların genişlənmə ehtimalı barədə Crossmedia.az-a danışan hərbi ekspert Üzeyir Cəfərov bildirib ki, bu addım gözlənilən idi: “Müəyyən şəxslər vəzifələrinin öhdəsindən layiqincə gələ bilmədiklərinə görə tənqid olunurlar və görünən odur ki, Dmitri Klimenko da onlardan biri olub. 2022-ci ilin oktyabrında bu vəzifəyə təyin edilən Klimenko Ukrayna ordusunun silahlanmasına, hərbi texnika və digər zəruri avadanlıqlarla təchizatına cavabdeh idi. Lakin son dövrlərdə Rusiyanın davamlı təzyiqləri nəticəsində Ukrayna ordusunda logistika problemləri və silah çatışmazlığı yaşanırdı. Bu və digər məsələlər Klimenkonun vəzifədən azad olunmasında mühüm rol oynayıb”.

Ekspert əlavə edib ki, Ukraynanın müdafiə naziri Rüstəm Umerov həm ordunun ali baş komandanı Aleksandr Sırskiyə, həm də Prezident Volodimir Zelenskiyə bəzi şəxslərin vəzifələrinin öhdəsindən gələ bilmədiyini məruzə edib və onların böyük ehtimalla vəzifədən uzaqlaşdırılacağını bildirib: “Qeyd etmək lazımdır ki, R. Umerovun özünə qarşı da cinayət işi açılıb. Müdafiə Nazirliyində aşkarlanan bəzi nöqsanlara görə, Ukrayna qanunvericiliyinə uyğun olaraq, onunla bağlı araşdırma aparılır. Buna görə də, D.Klimenkonun vəzifədən azad olunması son qərar olmayacaq. Ukrayna hazırda böyük çətinliklərlə üz-üzədir və üç ildir ki, beynəlxalq hüququ tanımayan bir dövlətə – Rusiyaya qarşı müqavimət göstərir. Ukrayna Silahlı Qüvvələrinin ciddi itkiləri var”.

Müsahibimizin fikrincə, gələcəkdə vəzifəyə yeni təyin olunan şəxslər də işlərində nöqsanlara yol versələr, vəzifədən uzaqlaşdırılacaqlar: “Ukraynanın silah və hərbi texnika ilə təchizatı məsələsi yalnız xarici dövlətlərlə aparılan danışıqlar yolu ilə mümkün idi. Bununla yanaşı, ölkədə hərbi sənaye kompleksinin inkişafı və zəruri vasitələrin istehsalı istiqamətində müsbət addımlar atılır. Bütün bunlara baxmayaraq, D. Klimenkonun vəzifədən azad edilməsi qərarı verilib. Düşünürəm ki, Ukrayna rəhbərliyi düzgün qərar qəbul edib. Çünki vəzifəsindən asılı olmayaraq, öz öhdəliklərini yerinə yetirə bilməyən şəxslərin vəzifədə qalması döyüş bölgələrində, cəbhə xəttində və ya ordunun müxtəlif bölmələrində ciddi problemlərə səbəb olur. Ona görə də Ukrayna Müdafiə Nazirliyində kadr dəyişiklikləri davam edəcək. Hətta yaxın zamanda R.Umerovun da vəzifədən azad olunmasının şahidi ola bilərik. Bunun baş vermə ehtimalı yüksəkdir. Çünki müəyyən maraqlar mövcuddur. Beləliklə, Rusiya-Ukrayna müharibəsinin gedişində Ukrayna Müdafiə Nazirliyində yeni kadr islahatlarının həyata keçiriləcəyini düşünürəm”.

Nihat Tahirov