Avropa
Zelenski güzəştə getsə üçüncü dünya müharibəsi başlaya bilər: Kreml "dişlərini qıcayıb"
ABŞ-də Donald Tramp administrasiyasının yenidən hakimiyyətə gəlişi fonunda Ağ Ev rəsmiləri Rusiya-Ukrayna müharibəsinə diplomatik yolla son qoymaq cəhdlərini pik nöqtəyə çatdırıblar. ABŞ rəsmisi Stiv Vitkovun Norveçdə Volodimir Zelenski, Moskvada isə Vladimir Putinlə sensasion görüşlərindən sonra sülh üçün yeni pəncərənin açıldığı bəyan edilib. BMTM-in xüsusi mandatlı rəsmiləri və ABŞ Dövlət Katibi Mark Rubionun açıqlamalarına görə, münaqişənin hərbi həlli yoxdur və tərəflər mütləq masaya əyləşərək qarşılıqlı güzəştlərə getməlidirlər. Mediaya sızan məlumatlara əsasən, noyabrın 10-dan sonra vaxtilə Yanvar-Fevral aylarında ABŞ və İsveçrədə sınanmış, lakin nəticəsiz qalmış üçtərəfli danışıqlar formatı yenidən işə düşəcək. Lakin diplomatik trafikin intensivləşməsinə baxmayaraq, cəbhədə dəhşətli raket və dron savaşı səngimək bilmir – Ukraynanın Rusiyaya bir gecədə 800-ə yaxın PUA ilə kütləvi zərbə endirməsi və Rusiyanın Ukrayna şəhərlərini ballistik raketlərlə atəşə tutması masadakı "sülh" nitqlərinin nə qədər kövrək olduğunu göstərir.
Mövzu ilə bağlı Crossmedia.az-a açıqlama verən Beynəlxalq Münasibətlərin Təhlili Mərkəzinin (BMTM) aparıcı məsləhətçisi Sultan Zahidov noyabrın 10-dan sonra gözlənilən üçtərəfli danışıqlar prosesini, tərəflərin güzəştə getmək istəməməsinin geostrateji səbəblərini və Donbas cəbhəsindəki reallıqlardan dəyərləndirib:
"Açıqçası, noyabrın 10-dan sonra başlayacağı iddia olunan bu üçtərəfli danışıqların real nəticə verəcəyinə son dərəcə pessimist yanaşıram. Əvvəllər də bu tip cəhdlər olmuşdu; ilin əvvəlində Birləşmiş Ştatlarda və İsveçrədə keçirilən üçtərəfli görüşlər heç bir nəticə vermədi. Əsas məqam tərəflər arasındakı barışmaz mövqe fərqidir. Real sülh razılaşmasının qarşısındakı ən böyük maneə tərəflərin bir-birinə güzəştə getmək istəməməsidir".
O, Rusiyanın Donbas iddialarının arxasında yatan strateji təhlükəyə və Avropadakı "Çemberlen xofuna" xüsusi diqqət çəkib:
"Ukrayna üçün ana şərt Rusiyanın hücumları dərhal dayandırması və hərbi əməliyyatların bitməsidir. Rusiya isə şərt qoyur ki, əməliyyatların dayanması üçün Donbas tam şəkildə onun nəzarətinə verilməlidir. Hazırda Donbasın təxminən 11 faizi Ukraynanın nəzarətindədir və həmin ərazilər ən güclü istehkamlarla əhatələnmiş, Ukraynanın "dəmir dabanı" hesab olunan qaladır. Əgər Rusiya o əraziləri ələ keçirərsə, Ukraynanın digər dərinliklərinə doğru irəliləmək üçün nəhəng strateji üstünlük qazanacaq. Zelenski Rusiyanın Donbasla yetinəcəyinə əsla inanmıram. Bu, 1938-ci ilin məşhur "Münxen sövdələşməsi" presidentini yaradar — o vaxt Hitləri sakitləşdirmək üçün torpaq verdilər, amma bu onun iştahını daha da artırdı və İkinci Dünya Müharibəsinə yol açdı. Avropanı bürüyən "Çemberlen xofu" da məhz budur. Buna görə də Qərb Zelenskinin güzəştə getməsini istəmir".
Sultan Zahidov ukraynalı döyüşçülərin və cəmiyyətin bu torpaqları Rusiyaya verməyəcəyini vurğulayaraq fikrini yekunlaşdırıb:
"İkinci mühüm fakt: Zelenski bu torpaqları necə peşkeş etsin? Artıq dörd ildir ki, Ukrayna əsgəri o torpaqlar uğrunda qan tökür, canını fəda edir. Bu gün sorğu keçirilsə, nə ordunun, nə də xalqın o ərazilərin Rusiyaya peşkeş edilməsinə razı olmadığını görərik. Tərəflər arasında gərginlik elə həddədir ki, hər iki tərəf hücumları intensivləşdirir — Ukrayna bir gecədə 800 dronla Rusiyanı vurur, Rusiya isə ballistik raketlərlə Ukrayna şəhərlərini dağıdır. 270 əsirin dəyişdirilməsi və cəsədlərin mübadiləsi isə rutin prosesdir. Real sülh üçün heç bir zəmin yoxdur və bu danışıqlardan ciddi bir nəticə hasil olacağına inanmıram".
Zeynəb Həsən
14:00 24.10.2026
Oxunuş sayı: 285
