ABŞ-nin yeni oyunu: Trampın qərarı Ukraynanı çıxılmaz vəziyyətə qoyur?
ABŞ Prezidenti Donald Trampın yanvarın 21-də imzaladığı fərman Ukraynaya göstərilən iqtisadi yardımın müvəqqəti dayandırılmasını nəzərdə tutur. Bu qərar beynəlxalq ictimaiyyətin diqqətini çəkib və iki ölkə arasındakı münasibətlərin gələcəyi ilə bağlı müxtəlif suallar doğurub. Buna baxmayaraq, ABŞ-nin Ukraynaya büdcə dəstəyi davam edir və rəsmi şəxslər yardımın tamamilə kəsilmədiyini bildirirlər. Sənədin detalları və onun mümkün təsirləri hələ də müzakirə olunur. Ekspertlər hesab edirlər ki, bu addım Ukraynanın iqtisadi və siyasi vəziyyətinə müəyyən təsir göstərə bilər.
Məsələ ilə bağlı Crossmedia.az-a açıqlama verən siyasi şərhçi Turab Rzayev bildirib ki, bu fərmanı iki şəkildə başa düşmək olar: “Birincisi, Tramp sülh ilə bağlı söz vermişdi ki, o, sülh müqaviləsi bağlayacaq, ən azından atəşkəsə nail olacaq. O, seçki kampaniyasında və ondan əvvəl dəfələrlə bu barədə danışıb. Tramp bildirirdi ki, əgər o, prezident olsaydı, Ukraynada müharibənin başlamasına imkan verməzdi.Bunun iki yolu var. Birincisi, təzyiqlərdir. Tramp tərəflərə təzyiq göstərməlidir. Çünki Rusiya istəyir ki, bu müharibə davam etsin, Ukraynanı maksimum şəkildə zəiflətsin və dövlət kimi mövcudluğunu təhlükə altına salsın. Digər tərəfdən, Ukrayna Prezidenti Volodimir Zelenski istəyir ki, Rusiyaya maksimum zərbə vurulsun, müharibə uzansın. Beləliklə, o, həm də öz siyasi karyerasının bitməməsini istəyir”.
Analitikin sözlərinə görə, artıq Artıq Rusiyaya qarşı böyük iqtisadi sanksiyalar hazırlanır, onun tamamilə iqtisadi çöküşü hədəflənir: “Rusiya neft sata bilməyəcək. Digər tərəfdən, Ukraynaya uzaqmənzilli raketlər və digər ağır silahların tədarükünə dair silahlar verilir. Məqsəd Rusiyanın geri addım atmasıdır. Eyni zamanda Tramp təkcə Ukraynaya yox, digər ölkələrə də yardımları dayandırıb. Bu gün müəyyən düzəlişlər edildi, yəni dərman, səhiyyə, humanitar və qida yardımları istisna edildi. Lakin silah yardımları dayandırılır. Bunun nəticəsində nə baş verəcək? Ukrayna silah-sursat ala bilməyəcək və məcbur qalıb mövqeyini yumşaldacaq, atəşkəsə tərəf gələcək.Düşünürəm ki, Trampın əsas məqsədi tərəfləri təzyiq vasitəsilə danışıqlar masasına gətirməkdir. İndiki məqamda ABŞ-ın Ukraynaya tamamilə dəstəyini dayandıracağını düşünmürəm. Çünki hərbi yardım dayandırılsa da, ən azından uzunmüddətli dövrdə davam edəcək”.
Ekspertin fikrincə, ABŞ və Avropa İttifaqının (Aİ) rəsmi Kiyevlə bağlı mövqeləri müxtəlifdir: “Aİ bəyan edib ki, ABŞ-nin qərarından asılı olmayaraq Ukraynaya dəstəyi davam etdirəcək. Belə olan halda, ABŞ ilə Avropa arasında parçalanma olduğunu görə bilərik. Avropa ayrıca Ukraynaya kifayət qədər maddi yardım ayıraraq müharibəni davam etdirməsinə şərait yarada biləcəyini düşünürəm".
Nərgiz Camalzadə
12:30 30.01.2025
Oxunuş sayı: 12407
