“Ermənistanın destruktiv siyasətinin davam etməsi Cənubi Qafqazda sabitliyə ciddi təhdid yaradır” - MÜSAHİBƏ

Son dövrlərdə Rusiya-Ermənistan münasibətlərində artan gərginlik, hər iki ölkənin rəsmi nümayəndələrinin sərt açıqlamaları ilə daha da kəskin xarakter alır. Xüsusilə, Ermənistan parlamentinin spikeri Alen Simonyanın Baltikyanı ölkələrin parlament nümayəndələri ilə görüşdə “Rusiya məhv edilməlidir” ifadəsini işlətməsi beynəlxalq səviyyədə geniş müzakirələrə səbəb olub. Ermənistanın ənənəvi tərəfdaşı Rusiyadan uzaqlaşaraq Qərbə yönəlməsi və Moskva əleyhinə sərt mövqe sərgiləməsi regionda siyasi balansın dəyişməsinə, eyni zamanda Cənubi Qafqazda sülh və təhlükəsizlik üçün yeni çağırışların yaranmasına səbəb ola bilər. Mövzu ilə bağlı deputat Tural Gəncəliyev Crossmedia.az-ın suallarını cavablandırıb:

-Regionda müttəfiq olan Rusiya-Ermənistan münasibətləri həqiqətən pisləşir?

- Son dövrlərdə Rusiya-Ermənistan münasibətləri gərginləşir və bu, hər iki tərəfin rəsmi şəxslərinin açıqlamalarında özünü göstərir. Ermənistanın Avropa İttifaqı ilə yaxınlaşması, KTMT tədbirlərində iştirakdan çəkinməsi və Baltikyanı ölkələrlə əlaqələrini gücləndirməsi bu münasibətlərin daha da pisləşməsinə səbəb olur. Ermənistanın Rusiyaya qarşı daha sərt ritorikadan çıxış etməsi də Avropa İttifaqının təsiri altında həyata keçirilən sinxron fəaliyyətin bir hissəsi kimi görünür.

- Bəzi analitiklər bunun şou olduğunu deyir. Sizin fikriniz necədir?

- Ermənistanın Rusiya ilə münasibətlərdə sərt mövqe sərgiləməsi təkcə şou deyil, həm də Avropa İttifaqı və Qərbdən aldığı siyasi təlimatlar çərçivəsində atılan addımlardır. Ermənistanın Avropa İttifaqı ilə yaxınlaşması real olsa da, bu daha çox manipulyasiya aləti kimi istifadə olunur. Çünki Avropa İttifaqı Ermənistanı tamhüquqlu üzv kimi qəbul etməyə hazır deyil, sadəcə onu Rusiyaya qarşı təzyiq vasitəsi kimi istifadə edir.

- Sizcə, Ermənistanın Baltikyanı ölkələrlə yaxınlaşaraq Rusiya ilə münasibətləri pozması Cənubi Qafqazda yeni siyasi bloklaşmaya səbəb ola bilərmi?

- Ermənistanın Qərbə yaxınlaşması və Baltikyanı ölkələrlə münasibətləri gücləndirməsi regionda siyasi bloklaşmanın dərinləşməsinə səbəb ola bilər. Ermənistanın bu siyasəti üçüncü qüvvələrin, xüsusilə də Avropa İttifaqı və ABŞ-ın Cənubi Qafqaza müdaxiləsini artırır. Bu da regionda balansı dəyişdirir və regional əməkdaşlıq formatlarına zərbə vurur.

- A.Simonyanın sərt açıqlamasına Rusiyanın münasibəti necə olacaq?

 - Rusiya, Ermənistanın bu siyasətinə qarşı hansı mövqe tutacağını özü müəyyən etməlidir. Son dövrlərdə Rusiya tərəfindən Ermənistanın destruktiv siyasətinə qarşı ciddi bir cavab verilmədiyi görünür. Lakin Ermənistanın Avropa İttifaqı missiyasını bölgəyə dəvət etməsi, Qərblə əlaqələrini gücləndirməsi və regional əməkdaşlıq formatlarını pozması Rusiyanın da Ermənistana qarşı mövqeyində müəyyən sərtləşmələrə gətirib çıxara bilər.

- Rusiya-Ermənistan münasibətlərinin bu müstəvidə irəliləməsi regionda sülh prosesinə necə təsir göstərəcək?

- Ermənistan parlamentinin spikeri Alen Simonyanın Rusiya ilə bağlı səsləndirdiyi fikirlər təkcə Rusiya-Ermənistan münasibətlərinə deyil, bütövlükdə regionun sabitliyinə təsir edə bilər. Bu kimi açıqlamalar bölgədə yeni gərginliklər yarada, Ermənistanın sülh prosesindəki rolunu daha da mürəkkəbləşdirə bilər. Xüsusilə də Ermənistanın destruktiv siyasətinin davam etməsi Cənubi Qafqazda uzunmüddətli sabitliyə ciddi təhdid yaradır.

Ayhan Ağarzayev