Azərbaycanda su təchizatı və tullantı suları sistemlərinə qoşulma üzrə tariflər uğurla həyata keçirilir

Azərbaycanda iqtisadi, siyasi, sosial və digər sahələrdə hər il müxtəlif tənzimlənmələr müəyyənləşdirilir və islahatlar keçirilir. Bu baxımdan Azərbaycanda su təchizatı və tullantı sularının axıdılması sistemlərinə qoşulma xidmətləri üzrə ilk dəfə dövlət tərəfindən tariflər müəyyən edilib. Bu addım, bu sahədə işlərin indiyədək pərakəndə şəkildə və qeyri-birxətli məbləğlərlə həyata keçirilməsinə son qoyaraq, xidmətlərin daha şəffaf və nizamlı şəkildə təşkil edilməsini təmin etməyə yönəlib.

Mövzu ilə bağlı iqtisadçı ekspert Samir Heydərov Crossmedia.az- a açıqlama verib. 

Ekspert bildirib ki, ölkə Prezidenti İlham Əliyevin müvəffəqiyyətli iqtisadi siyasətinin davamı olaraq bir sıra kommunal xidmətlərin tarifləri və sistemə qoşulma qaydaları müəyyənləşib: “Bu sahədə qaydaların müəyyənləşməsi xidmətlərin keyfiyyətinin artrılmasına və biznes mühitinin yaxşılaşdrılmasına xidmət edir. Tarif Şurasının iclasında Azərbaycan Dövlət Su Ehtiyatları Agentliyinin təklifi nəzərə alınaraq su təchizatı və tullantı sularının axıdılması sistemlərinə qoşulma xidmətinə görə ilk dəfə olaraq tariflər təsdiq edilib. İndiyədək bu sahədə işlər dövlət tənzimlənməsi olmadan pərakəndə şəkildə fərqli məbləğlərlə həyata keçirilirdi. Su təchizatı və tullantı sularının axıdılması üzrə təsdiq olunmuş tariflərdə əhali abonentləri üzrə qoşulma üçün həm sosial xarakterli ,həm də şəhər və regionlar üzrə diferensial yanaşma tətbiq olunub. Bu sahədə tənzimləmə qoşulma ilə bağlı xərcləri azaldacaq ,dayanıqlı və keyfiyyətli xidmət göstərilməsinə öz töhfəsini verəcək,maliyyə şəffaflığına və uçot sisteminin təkmilləşdrilməsinə eyni zamanda pərakəndiliyin aradan qaldrılması ilə sahibkarlar tərəfindən investisiya qoyuluşu zamanı xərclərin əvvəlcədən hesablanmasına şərait yaradacaq”.

S.Heydərovun fikrincə, Su təchizatı və tullantı sularının axıdılması sisteminə (STTSAS) qoşulma operativ şəkildə həyata keçirilir: “Bu istiqamətdə xidmətin əməkdaşları abonentlərin suallarına 7/24 həm telefon, həm də sosial şəbəkə hesabları üzərindən cavab verirlər.Ümumiyyətlə onu da qeyd edək ki, əhali abonentləri üçün Bakı, Sumqayıt, Xırdalan şəhəri, Abşeron rayonu üzrə su təchizatı şəbəkəsinə qoşulmanın birdəfəlik tarifi 200 manat,digər inzibati ərazi vahidləri üzrə isə 170 manat müəyyən edilib. Tullantı sularının axıdılması şəbəkəsinə qoşulma üzrə tariflər Bakı, Sumqayıt, Xırdalan şəhərləri, Abşeron rayonu  üzrə 345 manat, digər inzibati ərazi vahidləri üzrə isə 290 manat səviyyəsində təsdiq edilib. Sutka ərzində tələb olunan buraxılış həcmi 100 kubmetrə qədər olan tikinti obyektləri üçün su təchizatı şəbəkəsinə qoşulmanın bir dəfəlik tarifi borunun diametrindən asılı olaraq 995 manat və ya 1015 manat, tullantı sularının axıdılması şəbəkəsinə qoşulmaya görə 1635 manat məbləğində müəyyən edilib. Qoşulma ilə əlaqədar tikinti obyektinin vəsaiti hesabına görüləcək işlər 30 metrədək məsafəni əhatə edir. Bu məsafə 30 metrdən artıq olduqda isə mövcud şəbəkə təchizatçı tərəfindən genişləndrilir və bunun üçün əlavə ödəniş tələb edilmir”.

İqtisadçının sözlərinə görə: “2016-cı ildə yaradılmış Biznes Mühiti və Beynəlxalq Reytinqlər üzrə Komissiyanın fəaliyyəti qaneedici şəkildə həyata keçirilir. Komissiya davamlı iqtisadi islahatlar, iqtisadiyyatın şaxələndrilməsi, biznes və investisiya mühitinin yaxşılaşdrılması, sahibkarlığa dövlət dəstəyi və milli iqtisadiyyatın rəqabət qabiliyyətliyinin artrılması yolu ilə iqtisadiyyatda dayanıqlı və surətli inkşafa nail olunmasına istiqamətlənmişdir.

Məhz komissiyanın fəaliyyətinın müsbət nəticəsidir ki, ölkəmiz son aylar bir çox beynəlxalq reytinqlərdə qabaqcıl yerləri tuta bilmişdir. Komissiyanın tərkibində ümumilikdə müstəqil ekspertlərdən ibarət 25 işçi qrupu fəaliyyət göstərir ki, bunlardan biri də Su şəbəkəsinə qoşulma işçi qrupudur. İşçi qrupu göstərilən xidmətlərdə keyfiyyətin artrılmasına və biznes mühitinin yaxşılaşdrılmasına beynəlxalq reytinqlərdə Azərbaycanın mövqeyinin daha da yaxşılaşdrılmasına səbəb olan təcrübələri və innovativ idarəetmə metodlarının tətbiqinə, inzibatçılığın təkmilləşdrilməsinə səbəb olan tədbirlərin icrasına səbəb olan təcrübələrin tətbiqi üçün faəliyyət göstərir. Bu işçi qrupunun yaradılması inkşafa səbəb olan bir addımdır”. 
 
Fidan Hacızadə