ABŞ-dan Gürcüstana sərt mesaj: Rəsmi münasibətlər dayandırılır
ABŞ Gürcüstandakı “Gürcü Arzusu” hökumətinin tanınmasını qadağan etməyi nəzərdə tutan yeni qanun layihəsi hazırlayır.
Konqres, “Gürcü Arzusu” partiyasının lideri Bidzina İvanişviliyə yaxın şəxslərin rəhbərlik etdiyi Gürcüstan hökumətinə qarşı ABŞ-ın rəsmi münasibətlərinin dayandırılmasını nəzərdə tutur. Bu addım Qərbin daha dəqiq desək, ABŞ-nin Gürcüstana təzyiqi və ikili standartlarıdır.
Mövzu ilə bağlı politoloq Oqtay Qasımov Crossmedia.az-a açıqlama verib.
Politoloq bildirib ki, ABŞ-ın Gürcüstan hökumətinə və xüsusilə “Gürcü Arzusu”nun lideri Bidzina İvanişviliyə tətbiq etdiyi sanksiyalar son vaxtlar Gürcüstan ilə Qərb arasında yaşanan gərginliklə bağlıdır:
“Belə ki, Gürcüstan hökumətinin atdığı müəyyən addımlar Qərbin təzyiqlərinə müqavimət göstərərək Rusiya-Ukrayna savaşının gedişində ikinci cəbhəni açmaması və qəbul edilən bir çox qanunlar, təbii ki, tərəflər arasında münasibətləri gərginləşdirdi. Qərb, Gürcüstan hökuməti küçə etirazlarını dəyişə bilməyəcəyini anladıqdan sonra bu prosesi parlament seçkilərinə saxladı. Bu da xüsusi bir nəticəyə gətirib çıxarmadı”.
Onun sözlərinə görə: “Bu səbəbdən parlament seçkilərində qalib gəlmiş “Gürcü Arzusu” partiyasına qarşı daha sərt və radikal mövqe sərgilənir. Bütün bunlar demokratiya və insan azadlıqları adı altında Qərbin Gürcüstana tətbiq etdiyi təzyiqlərdir. Qərb məhz geosiyasi maraqlarını qəbul etdirmək üçün bu metodlardan istifadə edib.
Düşünürəm ki, bunun Gürcüstana müəyyən təsirləri ola bilər, amma Gürcüstan hökuməti də bu məsələləri diqqətə almaqla yanaşı öz siyasətində ciddi dəyişiklik edər deyə düşünmürəm”.
Ümumilikdə, bu gərginlik bir müddət davam edəcək. Gürcüstandakı proseslərə beynəlxalq geosiyasi rəqabətin nəticələri daha çox təsir göstərəcək. Çünki Qərb Cənubi Qafqazdan Rusiyanı sıxışdırıb çıxarmağa çalışır. ABŞ-da isə hakimiyyət dəyişikliyi baş verib. Yeni administrasiyanın bu məsələlərə münasibəti necə olacaq, bunu yaxın gələcəkdə görəcəyik”, - deyə Oqtay Qasımov qeyd edib.
Fidan Hacızadə
10:54 11.01.2025
Oxunuş sayı: 6862
