Avstraliya Azərbaycanlıları Assosiasiyasından Anım Günü ilə bağlı bəyanat
Avstraliyada fəaliyyət göstərən Azərbaycan diaspor təşkilatı 27 Sentyabr – Anım Günü münasibətilə bəyanat yayıb.
Crossmedia.az xəbər verir ki, Avstraliya Azərbaycanlıları Assosiasiyasının bəyanatında Azərbaycanın ərazi bütövlüyü və suverenliyi uğrunda həyatını itirmiş bütün şəhidlərin əziz xatirəsi dərin hörmət və ehtiramla yad edilib.
Bəyanatda bildirilib ki, Azərbaycan xalqı uzun illər ərzində torpaqlarının işğalı, yüz minlərlə soydaşının doğma yurdlarından məcburi köçkün düşməsi və beynəlxalq hüququn fundamental prinsiplərinin pozulması ilə üzləşib. Münaqişənin sülh yolu ilə həlli istiqamətində uzun illər aparılan səylərə baxmayaraq, ədalətli və davamlı nəticəyə nail olmağın mümkün olmadığı qeyd edilib.
Qeyd olunub ki, 27 sentyabr 2020-ci ildə başlayan 44 günlük Vətən müharibəsi Azərbaycanın ərazi bütövlüyünün bərpası istiqamətində tarixi mərhələ olub. Azərbaycan xalqının birliyi və həmrəyliyi, Silahlı Qüvvələrin fədakarlığı, Vətən uğrunda canından keçən şəhidlərin qəhrəmanlığı ölkənin tarixində mühüm iz buraxıb.
Bəyanatda 27 sentyabrın Azərbaycanda Anım Günü kimi qeyd edilməsinin 2 dekabr 2020-ci il tarixində Prezidentin Sərəncamı ilə təsis edildiyi xatırladılıb.
Assosiasiya beynəlxalq hüququn norma və prinsiplərinin bütün dövlətlərə münasibətdə bərabər və ardıcıl şəkildə tətbiq edilməsinin vacibliyini vurğulayıb. Bəyanatda Birləşmiş Millətlər Təşkilatının sənədlərində Azərbaycan ərazilərinin vəziyyəti ilə bağlı müxtəlif qərar və sənədlərin qəbul edildiyi bildirilib.
Avstraliyada yaşayan azərbaycanlıların adından beynəlxalq ictimaiyyət sülhün və təhlükəsizliyin qorunmasına, dövlətlərin suverenliyinə və ərazi bütövlüyünə hörmət edilməsinə, eləcə də beynəlxalq hüququn fundamental prinsiplərinin qorunmasına davamlı dəstək göstərməyə çağırılıb.
Bəyanatda milli birlik və həmrəyliyin qorunmasının, Azərbaycanın mövqeyinin beynəlxalq ictimaiyyətə çatdırılmasının, tariximizin və milli yaddaşımızın gələcək nəsillərə ötürülməsinin mühüm mənəvi borc olduğu bildirilib. Assosiasiya Cənubi Qafqazda davamlı sülhün, sabitliyin və qarşılıqlı hörmətin bərqərar olmasını dəstəklədiyini açıqlayıb.
Sonda Vətən uğrunda həyatını itirmiş bütün şəhidlərin ailələrinə və yaxınlarına dərin hüznlə başsağlığı verilib, onların əziz xatirəsinə ehtiram ifadə olunub.
13:30 26.09.2026
Oxunuş sayı: 49
