Rusiya “Şahəd” istehsalını artırmağa hazırlaşır
Rusiya 2029-cu ilədək “Şahəd” tipli zərbə PUA-larının istehsalını ildə əlavə 28 min ədəd artırmağa imkan verəcək istehsal güclərinin genişləndirilməsini planlaşdırır.
Crossmedia.az xəbər verir ki, “Politico” bu barədə Rusiyanın dövlət korporasiyası “Rosatom”un daxili sənədlərinə istinadən məlumat yayıb.
Məlumata görə, Tatarıstanda yerləşən “Alabuqa-Volokno” zavodunun genişləndirilməsi planlaşdırılır. Müəssisənin 2029-cu ilədək hərbi və aerokosmik məqsədlər üçün ildə əlavə 500 ton karbon lif istehsal etməsi nəzərdə tutulur.
Karbon lif yüngül və möhkəm material kimi zərbə PUA-larının gövdələrinin hazırlanmasında istifadə olunur. “Politico”nun sənədlər əsasında apardığı hesablamaya görə, yeni istehsal gücü ildə əlavə 28 min “Şahəd-136” tipli PUA gövdəsinin hazırlanmasına imkan verə bilər.
Bu göstəricinin Rusiyanın hazırkı illik “Geran” istehsalı ilə müqayisədə təxminən 78 faizlik artıma uyğun gəldiyi bildirilir. Ukraynanın qiymətləndirməsinə görə, Rusiya hazırda ildə 36 mindən çox “Geran” tipli zərbə PUA-sı istehsal etmək imkanına malikdir.
“Alabuqa-Volokno” Rusiyanın müdafiə sənayesi təchizat zəncirində mühüm müəssisələrdən biri kimi göstərilir. Müəssisənin genişləndirilməsi ilə bağlı hazırlıq işlərinin artıq aparıldığı, bunu may və iyul aylarında çəkilmiş peyk görüntülərinin də göstərdiyi qeyd olunur.
“Politico”nun məlumatına görə, sözügedən sənədlərin həqiqiliyi ABŞ Konqresinin Çin üzrə xüsusi komitəsi və Ukrayna hökuməti tərəfindən də araşdırılıb və təsdiqlənib.
10:57 21.09.2026
Oxunuş sayı: 55
