ABŞ-nin diplomatik cəhdləri Ukrayna müharibəsinin nizamlanması istiqamətində heç bir nəticə verməyib - Rəy
ABŞ Prezidenti Donald Tramp və Rusiya Prezidenti Vladimir Putin arasında keçirilən telefon danışığında əsas diqqət Ukraynadakı müharibənin mümkün qədər tez başa çatdırılmasına yönəlib. ABŞ nümayəndələrinin Moskva və Kiyevə səfərlərindən sonra baş tutan görüşdə tərəflər diplomatik səylərin davam etdirilməsini müzakirə edib, Tramp isə münaqişənin sona çatmasının ABŞ-Rusiya münasibətlərinin, o cümlədən ticarət və iqtisadi əməkdaşlığın bərpası üçün yeni imkanlar yarada biləcəyini bildirib.
Politoloq Elçin Xalidbəyli ABŞ-nin Ukrayna müharibəsinin dayandırılması ilə bağlı vasitəçilik cəhdlərinin hazırkı mərhələdə ciddi nəticə vermədiyini Crossmedia.az-a açıqlamasında bildirib. “İndiki mərhələdə Amerika Birləşmiş Ştatlarının atdığı addımlar, yəni Ukrayna savaşının dayandırılmasına yönəlik vasitəçilik cəhdləri elə bir ciddi nəticələr vermir. Çünki hər iki tərəfin şərtləri, tələbləri bir-birinə ziddiyyət təşkil edir. Rusiya işğal etdiyi Ukrayna ərazilərini, eyni zamanda Krımı öz sərhədləri içərisinə daxil etməkdə israrlıdır. Rəsmi Kiyev isə Ukraynanın heç bir ərazisini Rusiyaya güzəştə getməyəcəyini bəyan edir. Bu baxımdan mövqelər, şərtlər, tələblər bir-birinə kəskin ziddiyyət təşkil eləyir”.
O qeyd edib ki, tərəflərin mövqeləri arasında ciddi fikir ayrılıqları olduğundan yaxın zamanda razılaşmanın əldə olunması real görünmür: “Bu səbəbdən də yaxın vaxtlarda anlaşmanın əldə olunma ehtimalı o qədər də inandırıcı görünmür. Bütün bunları da nəzərə alanda hesab eləmək olar ki, Prezident Trampın vasitəçilik cəhdləri indiki mərhələdə iflasa məhkumdur. Bunu bir neçə gün öncə Prezident Trampın xüsusi nümayəndələri Kuşner və Uytkovun həm Moskvaya, həm də Kiyevə səfərlərinin uğursuz nəticələnməsi də təsdiqləyir”.
Politoloq vurğulayıb ki, ABŞ administrasiyasının diplomatik cəhdləri Ukrayna müharibəsinin nizamlanması istiqamətində müsbət nəticə verməyib: “Yəni bu səfərlər Ukrayna savaşının nizamlanması prosesinə heç bir pozitiv nəticə qatmadı, əksinə ziddiyyətlərin daha da dərinləşdiyi müşahidə olunur. Bu baxımdan hesab eləmək olar ki, Tramp administrasiyasının diplomatik manevrləri, diplomatik cəhdləri indiki mərhələ üçün uğur vəd eləmir. Əksinə, bu savaşın uzanma ehtimalı daha inandırıcı xarakter daşıyır”.
Nigar Xəlilli
19:30 09.09.2026
Oxunuş sayı: 52
