Xarici xəbərlər

Putin şirkətlərə xəbərdarlıq etdi: Müəssisələri qoruyun

Rusiyada kritik infrastruktur obyektlərinin milliləşdirilməsi ilə bağlı heç bir plan yoxdur və şirkətlər öz müəssisələrinin hücumlardan qorunmasını təmin etməlidirlər.

Crossmedia.az xəbər verir ki, Vladimir Putin bu barədə Şərq İqtisadi Forumunun plenar iclasında bildirib.

Putin qeyd edib ki, dövlətin hər hansı müəssisəni milliləşdirmək niyyəti olmayıb. O, neft-qaz sektorunda fəaliyyət göstərən şirkətlərdən öz müəssisələrinin təhlükəsizliyinin təmin edilməsinə diqqət yetirmələrini istədiklərini bildirib.

“İş ümumiyyətlə hansısa milliləşdirmə planlarından getmir. Dövlətin nəyisə milliləşdirmək niyyəti olmayıb. Biz həmkarlarımızdan, bu halda neft-qaz sektorunun nümayəndələrindən müəssisələrinin qorunmasına diqqət yetirmələrini xahiş etmişik”, – Putin deyib.

Bundan əvvəl Rusiyanın birinci vitse-premyeri Denis Manturov bildirmişdi ki, hazırda ölkədə heç bir şirkət kritik infrastruktur obyektlərinin təhlükəsizliyinin təmin edilməsi üçün yaradılmış yeni mexanizm çərçivəsində dövlətin müvəqqəti idarəçiliyinə verilməyib.

Onun sözlərinə görə, hakimiyyət yerli şirkətlərə infrastruktur obyektlərinin qorunmasında yardım göstərir. Hər bir region üzrə bütün tələbləri və şərtləri müəyyən edən kompleks regional planlar hazırlanıb.

Vitse-premyer bu mexanizmin tətbiqinə ehtiyac yaranmayacağına ümid etdiyini və şirkətlərin məsələyə məsuliyyətlə yanaşacağını bildirib.

Bundan əvvəl Rusiya Prezident Administrasiyası müəssisələrin müvəqqəti idarə olunması ilə bağlı fərmanın mahiyyətini açıqlamışdı.

Mövzular:

Rusiya Vladimir Putin Denis Manturov Şərq İqtisadi Forumu neft-qaz sektoru yerli şirkətlər Rusiya Prezident Administrasiyası

🖨 Çap et

14:57 03.09.2026

Oxunuş sayı: 45