Xarici xəbərlər

Hindistan sülh danışıqlarına qoşulmağa hazırdır

Hindistan Rusiya ilə Ukrayna arasındakı münaqişənin həlli istiqamətində bütün mümkün yollarla səylərə töhfə verməyə hazırdır. Crossmedia.az xəbər verir ki, “New Indian Express” bu barədə məlumat yayıb.

Hindistanın xarici işlər naziri Subrahmanyam Cayşankar bu barədə Kiyevə səfəri zamanı Ukraynanın xarici işlər naziri Andrey Sibiqa ilə görüşündə bildirib.

“Əgər Hindistan hər hansı şəkildə kömək edə bilərsə, biz buna hazırıq”, – Cayşankar deyib.

Hindistanın Baş naziri Narendra Modi avqustun 31-də Şanxay Əməkdaşlıq Təşkilatının sammiti çərçivəsində Rusiya Prezidenti Vladimir Putinlə görüşünün yekunlarına dair bildirib ki, Yeni Dehli Ukraynada sülh yolu ilə nizamlanmaya yönəlmiş bütün səyləri dəstəkləyir və bunu davam etdirəcək.

Modi münaqişənin hər gün davam etməsinin “bəşəriyyəti geriyə apardığını” vurğulayıb.

Hindistanın Baş naziri daha əvvəl bütün ölkələri Ukraynada qan tökülməsinin dayandırılması üçün mümkün olan hər şeyi etməyə çağırıb. O qeyd edib ki, hazırkı dövr müharibə deyil, dialoq və diplomatiya dövrüdür və insanların iztirablarına son qoymaq üçün bütün imkanlardan istifadə edilməlidir.

Bundan əvvəl Rusiya Prezidentinin mətbuat katibi Dmitri Peskov Vladimir Putinin Hindistana yaxın vaxtlarda səfər edəcəyini açıqlamışdı.

Mövzular:

Hindistan Rusiya Hindistanın Baş naziri Şanxay Əməkdaşlıq Təşkilatı Vladimir Putin Modi münaqişə Dmitri Peskov

🖨 Çap et

15:57 03.09.2026

Oxunuş sayı: 41