Xarici xəbərlər

İran Araz çayının vəziyyəti ilə bağlı XÜSUSİ İŞÇİ QRUPU yaratmağı təklif etdi

İran Araz çayının vəziyyətinin və suyun keyfiyyətinin davamlı monitorinqi üçün aidiyyəti qurumların iştirakı ilə xüsusi işçi qrupunun yaradılmasını təklif edib.

Crossmedia.az xəbər verir ki, “ISNA” bu barədə məlumat yayıb.

Təklif İranın su diplomatiyası sənədinin hazırlanması üzrə milli İşçi Qrupunun iclasında səsləndirilib. İclasda İran xarici işlər nazirinin müavini Kazım Qəribabadi də iştirak edib.

Görüşdə Ermənistan və Pakistanla bağlı su məsələləri, mövcud problemlər, imkanlar, mümkün həll yolları və onların icra mexanizmləri müzakirə olunub.

İran Kənd Təsərrüfatı Nazirliyinin su və torpaq işləri üzrə müavini Cəfər Gövhərqani Ermənistanın Araz çayı hövzəsində yerləşən ölkələrdən biri olduğunu qeyd edib. O, çayla bağlı məsələlərin qurumlararası və diplomatik əməkdaşlıq çərçivəsində davamlı şəkildə həll edilməsinin vacibliyini vurğulayıb.

Gövhərqani xüsusilə sənaye və mədən fəaliyyəti nəticəsində yarana biləcək çirklənməyə, həmçinin Ermənistan ərazisindəki elektrik stansiyalarından çıxan çirkab sularının Araz çayına axması ehtimalına diqqət çəkib.

İran rəsmisi bildirib ki, Araz çayının suyunun keyfiyyətinin monitorinqi birdəfəlik tədbir olmamalıdır. Onun sözlərinə görə, bu məqsədlə bütün aidiyyəti qurumların iştirakı ilə daimi fəaliyyət göstərəcək xüsusi mexanizm yaradılmalıdır.

🖨 Çap et

15:34 26.08.2026

Oxunuş sayı: 48