İntizamlı iş rejimi, yoxsa sərbəst qrafik? – Hansı daha sağlamdır?
Hər peşənin özünəməxsus iş rejimi və iş saatları var. Bəziləri hər gün eyni saatda işə başlayıb eyni vaxtda işi başa vurur, digərləri isə sərbəst qrafiklə, hətta məsafədən işləyirlər. Son illər xüsusilə hibrid və sərbəst iş modellərinin geniş yayılması iş qrafikinin insan psixologiyasına təsiri ilə bağlı müzakirələri də artırıb. Digər tərəfdən, insanın xarakterinə, peşəsinə və həyat tərzinə uyğun iş qrafiki həm psixoloji rahatlığı, həm də iş keyfiyyətini əhəmiyyətli dərəcədə artırır. Bəs hansı iş rejimi daha sağlam hesab olunur?
Məsələ ilə bağlı Crossmedia.az-a açıqlama verən psixoloq Zeynəb Əyyubova bildirib ki, sərbəst iş qrafiki ilə çalışan insanlar daha rahat, stressdən uzaq həyat tərzi sürürlər:
"Amma konkret iş qrafiki ilə çalışan insanlar daha intizamlı olurlar. Onların yatmaq saatı, oyanmaq saatı, yemək saatı bəlli olur və bütün gündəlik rejimləri intizam üzərində qurulur. İlk baxışdan onların işi daha çətin görünür, çünki müəyyən olunmuş iş rejiminə əməl etməlidirlər. Digər tərəfdən isə sərbəst qrafiklə çalışanlar daha rahat görünürlər. Lakin statistik göstəricilər onu deməyə əsas verir ki, intizamlı iş rejimində çalışan insanlar işlərini daha rahat və səmərəli yerinə yetirirlər. Psixoloji rahatlıq baxımından sərbəst iş qrafiki insanı psixoloji cəhətdən daha rahat hiss etdirir. Belə qrafikdə gərginlik və insanı təşvişə salan amillər daha az olur. Amma işin təşkili və əmək məhsuldarlığı baxımından konkret iş qrafikinə əsaslanan intizamlı iş rejimi daha məqsədəuyğundur".
Məhəbbət Tərlanoğlu
10:30 25.07.2026
Oxunuş sayı: 55
