Naxçıvanda “Uşaq hüquqları” və “İnformasiya təhlükəsizliyi” mövzusunda təlim proqramları təşkil edilib
20 dekabr 2024-cü il tarixində Naxçıvan Muxtar Respublikasında Ailə, Qadın və Uşaq Problemləri üzrə Dövlət Komitəsinin təşkilatçılığı ilə Uşaq Səfirlər Məclisinin Naxçıvan şəhəri, Babək, Şahbuz, Şərur, Sədərək, Culfa və Ordubad rayonları üzrə regional nümayəndələri və fəalları üçün “Uşaqların informasiya təhlükəsizliyi” və “Uşaq hüquqları” mövzusunda təlim proqramları təşkil edilib.
Crossmedia.az xəbər verir ki, açılış nitqi ilə çıxış edən Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsi Aparatının rəhbəri Eltun Həziyev tədbirin Naxçıvan şəhərində keçirilməsi və regionlarda yaşayan uşaqların təlimə cəlb edilməsinin önəmini vurğulayıb.
Daha sonra Ailə, Qadın və Uşaq Problemləri üzrə Dövlət Komitəsinin Uşaq məsələləri şöbəsinin müdir müavini Günel Nağdəliyeva diqqətə çatdırıb ki, uşaqların maraqlarına toxunan məsələlərdə onların iştirakının təmin edilməsi sahəsində fəaliyyətin gücləndirilməsi məqsədilə mütəmadi olaraq tədbirlər həyata keçirilir. O bildirib ki, “Uşaqdan-uşağa” layihəsi çərçivəsində təlimlərin keçirilməsində əsas məqsəd internetdən istifadə zamanı təhlükəsizliyin və məlumatların qorunmasını təmin etmək, uşaqlara inkişaf hüquqlarının təmin edilməsində təşəbbüs irəli sürmək, iştirakçılıq bacarıqlarının formalaşdırılması üçün şərait yaratmaq, eyni zamanda, uşaqlarda komanda ilə işləmək bacarıqlarını inkişaf etdirməkdir.
Uşaq Səfirlər Məclisinin üzvü Tunar Məmmədli internetdən istifadə zamanı təhlükəsizlik qaydalarına əməl etməklə fərdi məlumatların qorunması qaydalarını iştirakçılara çatdırıb. Məclis üzvləri Əliəkbər Babayev və Fatimə Hüseynli uşaqların hüquqları və onların müdafiəsi ilə bağlı mexanizmləri əhatə edən təlim keçiblər. Onlar uşaqların inkişafında rol oynayan ailə və cəmiyyət faktorlarından söz açaraq bildiriblər ki, uşaqlar öz üzərində işləməyi və təsiretmə bacarıqlarını formalaşdırmalıdır.
İnteraktiv şəkildə davam edən təlimdə iştirakçılar komandalar quraraq, uşaq inkişafına dair öyrəndikləri bilikləri “kahoot” tipli oyun vasitəsilə daha da möhkəmləndiriblər. Oyunun sonunda “Şuşa” komandası qalib gəlib.
Yekunda uşaqlara fəal iştiraklarına görə sertifikatlar təqdim edilib.
Qeyd edək ki, təlim proqramları “Uşaqlara dair Strategiyanın həyata keçirilməsi üzrə 2020–2025-ci illər üçün Fəaliyyət Planı”nın müvafiq bəndlərinin icrası məqsədilə “Uşaqdan-uşağa” layihəsi çərçivəsində həyata keçirilib.
09:33 23.12.2024
Oxunuş sayı: 10622
