Respublika Təcili Tibbi Yardım Mərkəzinin birləşdirilməsi prosesi başa çatıb
TƏBİB-in İcraçı direktoru Vüqar Qurbanov 2024-cü ilin yekunlarına və 2025-ci ilin planlarına həsr olunmuş mətbuat konfransında Respublika Təcili və Təxirəsalınmaz Tibbi Yardım Mərkəzinin birləşdirmə prosesinin uğurla tamamlandığını açıqlayıb.
Crossmedia.az xəbər verir ki, Vüqar Qurbanovun sözlərinə görə, il ərzində mərkəzin strukturunun yenidən təşkili effektiv şəkildə həyata keçirilib:
“Respublika Təcili və Təxirəsalınmaz Tibbi Yardım Mərkəzi üzrə birləşdirmə prosesi uğurla başa çatıb. Bu addım ölkədə təcili tibbi yardım xidmətlərinin daha effektiv və səmərəli təşkilinə yönəlib”.
İcraçı direktor yeni yaradılan tibbi mərkəzlər və struktur islahatları ilə bağlı da ətraflı məlumat verib. Bildirilib ki:
•Respublika Pediatriya Mərkəzi, Ağciyər Xəstəlikləri Mərkəzi, “Rəqəmsal Tibbi Həllər” MMC və İnnovasiya və Təchizat Mərkəzinin ştat və strukturu formalaşdırılıb.
•Dəmir Yol Xəstəxanasının tabeli TƏBİB-ə verilməsi prosesi çərçivəsində həmin xəstəxananın işçilərinin digər tibbi müəssisələrdə işlə təmin olunması müvəffəqiyyətlə həyata keçirilib.
•21 tibb müəssisəsinin ümumi ştat və strukturu yenidən təşkil edilib.
Vüqar Qurbanov həmçinin vurğulayıb ki, həyata keçirilən struktur islahatları Azərbaycanın tibb sektorunda göstərilən xidmətlərin keyfiyyətini artırmaq məqsədinə xidmət edir. 2025-ci ildə də bu istiqamətdə yeni layihələr və islahatların davam etdiriləcəyi gözlənilir.
Nihat Tahirov
08:50 23.12.2024
Oxunuş sayı: 11075
