TƏBİB-in tabeliyində 93 mindən çox işçi çalışır
TƏBİB-in İcraçı direktoru Vüqar Qurbanov 2024-cü ilin yekunlarına dair keçirilən mətbuat konfransında bildirib ki, hazırda TƏBİB-in tabeliyində 91 publik hüquqi şəxsin 2 701 tibb müəssisəsi fəaliyyət göstərir.
Crossmedia.az xəbər verir ki, bu müəssisələrdə 93 064 nəfər çalışır ki, onlardan 16 695-i həkimdir. TƏBİB aparatında isə 315 nəfər fəaliyyət göstərir.
2024-cü il ərzində TƏBİB-in tabeliyindəki tibb müəssisələrində peşəkar kadrların işə qəbulu üçün intensiv işlər görülüb. Müsahibə tələb olunan vəzifələr üzrə 1 245 müraciətdən 711-i, rəhbər vəzifələr üzrə isə 79 müraciət müsbət qiymətləndirilib. Müsahibəsiz müraciətlər üzrə 748 müraciətdən 494-ü qəbul edilib. TƏBİB aparatında çalışmaq üçün 306 namizəd müsahibəyə dəvət edilib, onlardan 69-u işə qəbul olunub.
İl ərzində Azərbaycan Tibb Universitetinin Müalicə və profilaktika fakültəsinin yuxarı kurs tələbələri üçün “TƏBİB-in tabeliyindəki tibb müəssisələrində orta tibb heyəti kimi işə qəbul” layihəsi həyata keçirilib. Bu layihə çərçivəsində 100 tələbə imtahandan uğurla keçərək təlimlərə cəlb olunub. Bundan əlavə, “TƏBİB könüllüləri” layihəsi çərçivəsində 150-dən çox tələbə könüllü kimi fəaliyyət göstərib.
Maral Şahverdili
08:25 23.12.2024
Oxunuş sayı: 8973
