Respublika Təcili Yardım Mərkəzinə 1,6 milyondan çox çağırış daxil olub
2024-cü ilin yanvar-noyabr aylarında Respublika Təcili və Təxirəsalınmaz Tibbi Yardım Mərkəzinə 1,6 milyondan çox çağırış qeydə alınıb. Crossmedia.az xəbər verir ki , bu barədə TƏBİB-in İcraçı direktoru Vüqar Qurbanov qurumun illik yekunlarına və gələcək planlarına həsr olunmuş mətbuat konfransında məlumat verib.
Onun sözlərinə görə, ən çox müraciət Bakı şəhəri üzrə qeydə alınıb. Paytaxtda 11 ay ərzində 781 min 152 çağırış daxil olub. Sumqayıt şəhərində bu göstərici 132 min 711, Gəncədə 93 min 536, Mingəçevirdə 38 min 357, Abşeronda isə 34 min 46 olub.
"Bakı üzrə daxil olan çağırışlardan 742 min 152 nəfərə yerində tibbi yardım göstərilib, 75 min 21 nəfər isə hospitalizasiya olunub. Bununla yanaşı, paytaxtda 39 min əsassız çağırış qeydə alınıb. Ümumilikdə, Bakı üzrə gündəlik müraciətlərin sayı 2 min 200-2 min 300 arasında dəyişir,” – deyə Vüqar Qurbanov qeyd edib.
Bu statistik rəqəmlər təcili tibbi yardım xidmətlərinə olan böyük tələbatı və şəhərlər üzrə bölgüləri əks etdirir.
Nihat Tahirov
07:52 23.12.2024
Oxunuş sayı: 6816
