Tibb müəssisələrinə müraciətlərdə və xidmətlərin sayında artım qeydə alınıb
TƏBİB-in İcraçı direktoru Vüqar Qurbanov 2024-cü ilin yekunlarına və 2025-ci ilin planlarına dair keçirilən mətbuat konfransında cari il üzrə tibbi xidmətlərdə nəzərəçarpan artım olduğunu bildirib.
Crossmedia.az xəbər verir ki, onun sözlərinə görə, 2024-cü ilin yanvar-noyabr ayları ərzində tibb müəssisələrinə 22,1 milyon müraciət qeydə alınıb, 76,8 milyon tibbi xidmət göstərilib.
“2023-cü illə müqayisədə cari ildə müraciətlərin sayında 9%, tibbi xidmətlərin sayında isə 20%-lik artım müşahidə olunub. Ötən il ərzində 20,3 milyon müraciət və 63,8 milyon tibbi xidmət qeydə alınmışdı,” – deyə V.Qurbanov vurğulayıb.
O qeyd edib ki, 2024-cü ilin ilk on bir ayı ərzində 348 mindən çox cərrahi əməliyyat və prosedur həyata keçirilib. Həmçinin, bu dövrdə laborator xidmətlərin sayı 30,5 milyon olub ki, bu da ötən ilin müvafiq dövrü ilə müqayisədə 34% artım deməkdir.
“Cari ilin yanvar-noyabr aylarında 6 milyondan çox radioloji müayinə aparılıb,” – deyə TƏBİB rəhbəri əlavə edib.
Bu rəqəmlər ölkənin tibbi xidmətlər sektorunda artan tələbatı və inkişafı əks etdirir.
Nihat Tahirov
07:34 23.12.2024
Oxunuş sayı: 8830
