Xarici xəbərlər

İran səfiri: Ermənistan enerji tranzitində unikal həlqəyə çevrilə bilər

İranın Ermənistandakı səfiri Xəlil Şirqolami Ermənistanın gələcəkdə enerji sahəsində mühüm tranzit mərkəzlərindən birinə çevrilə biləcəyini bəyan edib.

Crossmedia.az xəbər verir ki, diplomat Yerevanda jurnalistlərə açıqlamasında İran və Ermənistan arasında enerji əməkdaşlığının genişləndirilməsi ilə bağlı intensiv müzakirələrin aparıldığını deyib.

Onun sözlərinə görə, tərəflər təbii qaz, neft məhsulları, eləcə də enerji resurslarının daşınması və tranziti sahəsində yeni layihələri nəzərdən keçirirlər.

Şirqolami qeyd edib ki, İran neft və qaz ehtiyatlarına görə dünyada üçüncü yerdə qərarlaşır, Ermənistanın şimalında yerləşən Rusiya isə enerji sektorunun aparıcı ölkələrindən biridir.

Diplomat hesab edir ki, regionun bu potensialından düzgün istifadə olunarsa, Ermənistan enerji tranziti sahəsində unikal mövqe qazana bilər.

"Əgər tərəflər lazımi siyasi iradə nümayiş etdirsələr, enerji potensialının dərinləşdirilməsi fonunda Ermənistan tamamilə yeni geoiqtisadi mövqeyə yüksələ bilər", – deyə İran səfiri vurğulayıb.

🖨 Çap et

12:16 08.07.2026

Oxunuş sayı: 43