Xarici xəbərlər
Yəməndə 200 min insan didərgin düşüb
Yəməndə humanitar böhran dərinləşir, avqustun əvvəlindən bəri 200 mindən çox insan evini tərk etmək məcburiyyətində qalıb.
Crossmedia.az xəbər verir ki, bu barədə BMT-nin Baş katibinin müavini və fövqəladə yardım koordinatoru Tom Fletçerin adından çıxış edən fövqəladə hallar üzrə koordinatorun müavini Məhəmməd Yəhya BMT Təhlükəsizlik Şurasının iclasında məlumat verib.
Yəməndəki vəziyyətin müzakirə olunduğu iclasda çıxış edən Yəhya humanitar böhranın ciddi şəkildə pisləşdiyini vurğulayıb. O bildirib ki, bu istiqamətdə əlavə tədbirlərin görülməməsi insan tələfatına səbəb ola bilər.
Son iki ayda artan toqquşmaların on ildən artıqdır davam edən münaqişələrdən yorulmuş mülki əhalinin vəziyyətini daha da ağırlaşdırdığını deyən Yəhya qeyd edib ki, ailələr tükənən yığımları, dolanışıq imkanlarının azalması və təhlükəsizliyə nail olmaq üçün məhdud seçimlər səbəbindən yenidən evlərini tərk edirlər.
Onun sözlərinə görə, avqustun əvvəlindən bəri Yəmən üzrə 200 mindən çox insan məcburi köçkünə çevrilib. Bu, 2022-ci ildə əldə olunan atəşkəsdən sonra qeydə alınan ən yüksək yeni köçkün sayıdır.
17:26 10.10.2026
Oxunuş sayı: 66
